Хайи диде-буба, вах-стха, халкь, багъри макан ва санлай Ватан кIан тийидай ксар бажагьат жеда. Амма са кар ава: гьа и кIанивал гьар сада вичиз хас тегьерда къалурзава. Садбуру халкь патал чпелай алакьдай вири хъсан крар ийида. Масадбуру лагьайтIа, сифте чкадал хсуси игьтияжар эцигда. “Зун авай чкада заз масадбур герек туш” лугьудай психология, идеология вине кьаз чалишмишвалда. КIеве гьатай вахтунда вичин чан хуьн паталди бубани, ватанни маса гудайбурни жеда. Ихьтинбур вири вахтара хьайиди я, гилани авазва. И кар чаз, Украинада военный махсус серенжемдив эгечIайла, уьлкведай катай ва интернетда Донбассдин агьалияр Украинадин фашистрикай хуьн, азад авун патал тухузвай серенжемдилай рази тушир инсанрин гьерекатрини къалурзава.
Ватан хуьн, адаз къуллугъ авун гьар садан буржи я. Гьар йисан 23-февралдиз чна Ватандин къаравулда акъвазнавай кьегьалар рикIел гъизва, абурун гьуьрметдай чими келимаяр лугьузва. И юкъуз чна четин, амма гьуьрметлу пеше — Ватандиз вафалудаказ къуллугъ авунин, уьлкведин милли итижар хуьнин, адан оборонадин бинеяр, къурулушар, сенгерар мягькемарунин, чи ватандашриз уьмуьрдин ислягь, къулай, Россия дурумлудаказ вилик финин шартIар яратмишунин пеше хкянавай ксар тебрикзава. Агъур имтигьанрин вири йисара хайи чил душмандикай хвейи гзаф несилрин, аскеррин кьегьалвилер халкьдин рикIера гьамишалугъ амукьда. Абурулай къенин несилрини чешне къачузва.
Алай вахтунда чи уьлкведин Яракьлу Къуватар РагъакIидай патан ва США-дин мидявилин, Россия кIеве тваз алахъунин сиясатдин, Украинада цIай тунин ва гьакI международный террориствилин организацийриз акси женгинин вилик квай сенгеррал ала.
Ватан хуьнин буржидиз вафалу рухваяр, рушар чи уьлкведа гзаф ава. И кар абуру Ватандин ЧIехи дяведин агъур йисара, фашистрин кьушунри барбатIай хуьрер, шегьерар, карханаяр, майишатар кIвачел ахкьалдардайла, вад йисарин планар кьилиз акъуддайла, стха уьлквейрин тIалабуналди интернационалиствилин буржи тамамардайла, 1999-йисуз Дагъларин уьлкведал яракьламиш хьанвай бандитрин дестейри вегьейла, уьтквемвилелди кьилиз акъудна. Гилани Донбассдин шегьерар, хуьрер миллетбазрикай азадзава.
Лугьун хьи, винидихъ тIвар кьунвай вири жуьредин дявейра ва женгера, серенжемра лезги халкьдин векилрини къагьриманвилелди иштиракна ва и ватанпересвилин кар давамарзава. Россиядин армиядин жуьреба-жуьре кьушунра, аскеррилай, морякрилай гатIунна, генералрал, сад лагьай рангдин капитанрал къведалди чи ватанэгьлийри вафалувилелди, кьегьалвилелди къуллугъзава, чпин везифаяр жавабдарвал гьисс авуналди, тамамарзава.
Вири вахтара чи ватанэгьлийри Россиядин армиядин жергейрани, ислягь ва гьунарлу зегьметдани Ватандиз вафалувал къалурзава. Куьрелди лагьайтIа, ватанпересвал дагъустанвийрин ивидик квай ери я. Дагъларин уьлкведин тарихда чи бубайри ва къенин несилри и кар ватан кIеве гьатай гьар уламда тестикьарзава. ИкI тирвиляй Дагъустандин чилелай чи зурба уьлкве фашистрин чапхунчийрикай хуьз фейи 58 кьегьал Советрин Союздин Игит лагьай тIварцIиз лайихлу хьана. Алай вахтундани Россиядин Игитвилин тIварцIиз лайихлу хьанвайбурун кьадар яхцIурдав агакьзава. Абурун арада Донбасс миллетбазрикай азадзавай женгера кьегьалвилер къалурай Россиядин Игитар — Нурмегьамед Гьажимегьамедов, Энвер Набиев, Эседулла Абачев, Руслан Къурбанов, Исрафил Мегьамедов ва гьакI “Жуьрэтлувиляй” орден ганвай 220 кас ава. Им дамахдай кар я. Милливал, дагъвивал вине кьур ва Ватандиз вафалувал къалурай ихьтин рухваяр акьалтзавай несилдиз ватанпересвилин тербия гунин карда хъсан чешне я.
Чи уьлкведин ва гьакI дуьньядин майданда ислягьвал хуьн, дяведик цIай кутаз кIанзавай уьлквейрин, НАТО-дин иштагьар квадарун ва дявекарриз дуьзгуьн жаваб гун патал лазим кьадарда лап вини дережадин военный техникани герек жезва. Къенин юкъуз Россиядин Яракьлу Къуватрин вири кьушунар бес кьадарда ва алай аямдин вири жуьредин яракьралди, техникадалди ва виниз тир чирвилер, алакьунар авай пешекарралди, офицерралди таъмин я.
Эгер кьилди-кьилди къа-чуртIа, къе армиядин кар алай хел яз гьисабзавай гьавадинни космический къуватрин кьушунар лазим кьадарда самолетралди, вертолетралди, кас галачиз лув гудай аппаратралди, бажарагълу пешекарралди таъмин я. Эхиримжи йисара уьлкведин Президентди, гьукуматди Яракьлу Къуватрин хилез, оборонадин месэлайриз еке фикир гузва, лазим кьадарда пулар чара ийизва, оборонадин цIийи карханаяр ачухзава. Россиядин аскерар, офицерар патал яшайишдин, къуллугъ авунин къулай шартIар тешкилзава, абур яшайишдин кIвалералди таъминарзава. Ихьтин сиясатди хъсан нетижаярни арадал гъизва. Россиядин аскердин авторитет хкаж хъхьанва. Ватанпересвилин руьгь квай кьушунрини лап муракаб месэлаяр гьялзава.
Дяведин гьавадин флот арадал гъайи сифте йисар рикIел хкайтIа, ам фанерадикай авунвай поршневой самолетрикай ибарат тир. Къе чи армия сесинилайни йигиндиз лув гудай, чпелай лап муракаб крар алакьдай ва яргъал мензилриз фидай самолетралди таъмин я. Абур гьалзавай Россиядин летчикри чпин алакьунар Кореядин, Вьетнамдин, Египетдин, Афгъанистандин, Сириядин ва Европадин са бязи уьлквейрин бушлухрани къалурна.
Мукьвара журналистрин суалриз жавабар гудайла, Владимир Путина яракьриз талукь рахунарни авуна. Ада къейдна хьи, Россияди, санкцийриз, мидя уьлквейрин кьилерин ва НАТО-дин регьберрин кичIерар гудай гьерекатризни, маса къадагъайризни килиг тавуна, виликди камар къачудайла, РагъакIидай пад чархара мадни лашар тваз, НАТО-дин кьушунар чи сергьятрив гъиз алахъзава. Амма чахъ абуруз жаваб гудай вири такьатар ава.
Къейд авун лазим я хьи, Россиядин военно-космический къуватра ва гьакI маса кьушунрани дагъустанвийри, гьа гьисабдай яз лезги халкьдин векилрини уьтквемдиз, жуьрэтлувилелди къуллугъзава. Идакай командиррилай диде-бубайриз, военкоматриз хквезвай лишанлу чарарини шагьидвалзава.
Чна къе виридаз Ватан хуьзвайбурун югъ мубаракзава. Ватандин къаравулда акъвазнавай гьар садахъ мягькем сагъламвал, агалкьунар хьун чи мурад я.
Хийир Эмиров
