Бейкарвиляй гузвай пособие кIвалах къакъатай ва я сифте яз кIвалах жагъурзавай ксаривай къачуз жеда. Идакай РД-дин МФЦ-дин кьилин идарадин пешекарри хабар гана.
Пособидин са вацран агъа кIанин кьадар 1500 манат я. Кьилди къачуртIа, и такьатар талукь жезвайбурук акатзава:
— сифте яз кIвалахдихъ къекъвезвайбур;
— йисалай артух муддатда кIвалах тавунвайбур;
— йисан муддатда 26 гьафтедилай тIимил кIвалахнавайбур.
Пособидин вини кьадар — 12 792 манат — ватандашрин муькуь категорийривай сифтегьан пуд вацра къачуз жеда. Гуьгъуьнин варцара пособидин кьадар 5 агъзур манатдикай ибарат жеда. Такьатар зур йисан вахтунда гузва.
Пенсиядиз фидай вахт мукьва жезвай яшара авайбурувай (предпенсионер) бейкарвиляй 12 вацран муддатдал кьван такьатар къачуз жеда. Эгер пенсиядиз фидай яшдив агакьзавай, кIвалахдик квачир касди пособие тайинардай макъамда официально 26 гьафтедилай тIимил тушир вахтунда кIвалахнаватIа, адавай къачуз жеда:
— сифтегьан пуд вацра — алатай къазанжидин 75 процент, амма 12 792 манатдилай артух ва 1500 манатдилай тIимил тушиз;
— гуьгъуьналлай 4 вацра — 60 процент;
— муьжуьд лагьай вацралай — 45 процент.
Пособие къачун патал агьалияр кардал машгъулардай центрада учетда акъвазун чарасуз я. И кар са шумуд къайдада кьилиз акъудиз жеда:
— арада мензил аваз — “Работа России” ва я “Госуслуги” порталрин куьмекдалди;
— агьалияр кардал машгъулардай центрадиз жув финалди.
ЦIуд йикъан къене квез кIвалахдин азад чка (вакансия) хкяда ва квез абуруз килигун патал теклифда. Куьн бейкар яз тестикьарда ва, эгер куьн теклифзавай кIвалахдай чкайрилай рази хьайитIа, амма кIвалах гузвайда кьабул тавуртIа, гьа дуьшуьшда квез пособие тайинарда.
Харжарин са пай хгуда
Хуьруьн майишатдал машгъулбуруз теплицаяр туькIуьруниз серфзавай такьатрин 50 процент кьван къачудай мумкинвал ава. Идакайни РД-дин кьилин МФЦ-ди хабар гузва.
Субсидияр Дагъустандин дагълух мулкара майишатдин кIвалахар тухузвай юридический тешкилатриз (государстводин, муниципальный идараяр квачиз) ва хсуси карчивилел машгъулбуруз гузва.
Государстводин куьмекдин сергьятра аваз тайинарзавай такьатар 5 агъзур квадратный метрдал кьван майданда (алай ва я алатай пуд йисан муддатда ишлемишнавай) теплицаяр туькIуьруниз авунвай харжарин пай яз рекье твазва.
Къейдзавайвал, субсидияр гьакъикъатда серфнавай такьатрин 50 процентдин кьадарда аваз, НДС квачиз, амма 1 касдиз 3 миллиондилай артух тушиз гузва. И такьатар къачун патал МФЦ-дин идарайри 6-февралдилай 6-мартдалди арзаяр кьабулзава.
Субсидийрин вири жуьрейрикай галай-галайвал тамам малуматар РД-дин экономикадин ва мулкар вилик финин министерстводин сайтдин “Дагълух мулкар” разделдай ва я телефондин 8 (8722) 67-20-10 нумрадиз зенгна, чириз жеда.
«Лезги газет»
