Алатай йисан юкьварилай инихъ СтIал Сулейманан райондин хуьрера мукьвал-мукьвал эквер хкахьиз хьанай. И татугайвили инсанар нарази, ажугълу ийизвай. ГьикI хьи, эквер хкатиз-ахкатунин нетижада кIвале авай техника къайдадай акъатзава. И кардихъ галаз алакъалу яз гьатта арзаяр кхьей дуьшуьшарни хьана.  Ингье йис алатна, гила цIийи йис вичин ихтиярда гьатнава. 

Кьасумхуьруьн РЭС-ди, инсанрин наразивилер фикирда кьуна, кIвалахда цIийи­ви­лер, дегишвилер твазва. Сифте нубатда эквер хкатунин себебар чирна. Малум хьайивал, гзаф хуьрера токдин симер тарарин арайрай, хилерилай фенва, бязи дуьшуьшра  хилер симерал алгъанваз жезва. И хаталу карди эквер бейхабардиз хкатунал гъизвай.

Гила махсус бригадади,  нубатдалди хуьрериз физ,  хата­лу гьалда авай — симер та­ра­рин хилерихъ галукьзавай чкаяр виликамаз чирзава, ахтармишзава ва абур атIузва, ­электричестводин симер лазим тир къайдадиз хкизва. Бригадада 6 кас ава. Абурун ихти­ярда махсус мишерар, тарарин кукIва­ри­лай ­ви­низ хкаж жедай мумкинвал гудай тада­ракар ава. Старший мастер Дадашев Бала­фен­дидин гуьзчивилик кваз, бригадади пуд СтIал­рал, Сийидрал, Алкьвадрал, Курхуьре ва масанра важиблу и кIвалах кьиле тухвана. И кардал машгъул хьанвай Гьамидов ­На­дира, Уьзденов Исабега, Абдурагьманов Юсуфа ва масабуру хъсандиз зегьмет чIуг­вазва. Абуру рехне квачиз, михьивилелди кIвалахзава.

“Амай чкайрани, хуьрерани чна гъиле кьунвай кар вахтунда кьилиз акъудда”, — лугьузва мастер Б.Дадашева.

Райсудин Набиев