Гьуьрметлу “Лезги газетдин” редакция!
51-нумрада куьне чапнавай “СССР амайтIа”… макъалада авай делилар дуьзбур, гьахълубур тирди миллионралди инсанри тестикьарзава.
Горбачеванни Ельцинан девирда чи школада рагьметлу Ризаев Мегьерам муаллимди кIвалахзавай. Ада гьар юкъуз, са цIийи хабар ван хьайила, “валлагь, гадаяр, квез хъел къвемир, чи правительствода (гьукумда) шпион ава”, лугьудай. Рагьметлуда вичин вахтунда шиирарни кхьизвай. И мукьвара адан кьве шиир заз гьатна. Абурун мана-метлеб, дугъриданни, адан фикиррихъ галаз кьунвайбур я.
За тIалабзава и шиирризни газетда чка гун. СССР чукIуруник чпин къуьн кутурбурни халкьдин душманар хьайидал шак алач…
Саламралди, квез гьуьрметзавай Ферид Вагьабов, куь мухбир ва муаллим.
ИкI жедани, я Горбачев?
На Бушакай кьуна куьлег,
БарбатIна чи Совет уьлкве.
Вун пенсиядиз гьатна рекье,
ИкI жедани, я Горбачев?
Сад устIар яз, сад прораб,
Чи кадгъай кIвал уна хараб,
Гьич къайгъуни ятIа яраб,
Чи гьалдикай ваз, Горбачев?
“Волга” машин, шофер галаз,
Охранщикни гайила ваз,
Биржад базар къалурна чаз,
Вун гьинихъ я, я Горбачев?
Гьатнамазди ви гъиле ав,
— Чиди я чил, чиди я цав, —
Лугьуз вуна, акъудна чав,
Къе гьикI хьана, я Горбачев?
На туькIуьрай чIуру гъелцин
КукIвал алаз физва Ельцин.
Гужлувиляй вичин ванцин
Ван къвезамач маса касдин.
Бес им гьикI хьуй, я Горбачев?
Гагь Япунда, гагь Фергеда
Пабни галаз вун къекъведа.
ЧIуру фактар тваз гьебеда,
ЧукIур хъийиз чи уьлкведа,
ИкI жедани, я Горбачев?
Куь гьерекатрин нетижада
СССР-дикай хьана СенГе.
Ельцинакай адан енге,
Горбачевни аваз кIвенкIве,
Бушаз некягьна чи уьлкве.
Перестройка
ЦIийи хъизва луз инкъилаб,
Гайи гафар акъатна таб.
Уьлкве икIа хьана хараб.
Амач са кас гудай жаваб.
— Нивай я бес, куьвай я?
— Перестройкадивай я!
Кар кьадайла ганач фикир,
ГьикI жед лугьуз адан эхир.
Къе инсанрин гарданар кIир
Хьана, ама ийир-тийир.
— Нивай я бес, куьвай я?
— Перестройкадивай я!
Экономика са шумуд къат
Агъуз вегьей кьве “демократ”,
КутуртIани виш домкрат,
Хкаж хъидай амач такьат.
— Нивай я бес, куьвай я?
— Перестройкадивай я!
Советский хуьр.
Мегьерам Ризаев
