Ихтибардикай “хийир” хкудиз кIан хьана

Махачкъаладин Кирован райондин полициядин къуллугъчийриз и шегьердай тир 34 йисан яшда авай ди­шегьлиди малум тушир касди вичин кIваляй 17 агъ­зур­­­ манат пул ва 125 агъзур манатдин къимет авай къи­зилдин затIар чуьнуьхайдакай хабар гана. Идакай РД-дин МВД-дин телеграм-каналда кхьенва. Арзачидин гафаралди, малум тушир кас кIвализ иеси авачир вахтунда гьахьна.

Полициядин къуллугъчийри шак физвайди тайинарна ва отделдиз хкана: ам Къаякент райондин 22 йисан яшда авай агьали я.

Жегьилди арзачи дишегьли вичиз аял чIавалай чизвайдакай ва мукьвал-мукьвал адан кIвализ мугьманвилиз физвайдакай ихтилатна. Мукьвара лагьайтIа, дишегьлиди кIвалин запасдин куьлегар жегьилдив вугана ва адаз вич авачир вахтунда, са четинвални авачиз, кIвализ фидай ихтияр гана.

Са сеферда кIвализ атайла, жегьилдиз шкафда авай къизилар акуна. Ада къизилар чуьнуьхун кьетIна. Амма, вичел шак фин тавурай лугьуз, ада сифте нубат­да куьлегдин дубликат акъудна ва дишегьлиди вугай куьлег элкъуьрна гьадав вахкана. Гуьгъуьнлай, кас ава­чир ма­къам вилив хвена, жегьилди кIваляй багьа затIар чуьнуьхна.

Полициядин къуллугъчийри шак физвайдавай ­къизилдин бязи затIар вахчуна ва иесидив ахгакьарна. И делилдай суд-силис авун патал материал кIватI­нава.

«Лезги газет»