И йикъара Дагъустандин карчивилиз куьмек гунин центрада “Дагъустандин виридалайни хъсан вирт-2022” конкурсдин гъалибчийрив ва призеррив шабагьар вахкузвай мярекат кьиле фена. Конкурсдиз Дагъустандин куьнуьчийри ругуд номинациядай 34 жуьредин виртIер гъанвай.
Мярекатдин тешкилатчияр яз Вирироссиядин жемиятдин “Россиядин куьнуьчийрин союз” тешкилатдин Дагъустандин отделение, Дагъустандин аграрийрин госуниверситет ва РД-дин карчийринни инвестицийрин Центр экъечIнавай.
Конкурсдин асул макьсад республикадин куьнуьчийрин кIвалахдик къуьн кутун, виртIедин хъсан сортар арадал гъиз ашкъиламишун, куьнуьчивилин пеше ва виртIедин менфятлувал раиж авун я.
Шад жедай кар ам я хьи, и мярекатда Дагъустанда ва Россияда машгьур, тежрибалу куьнуьчи, бине Кьурагь райондин Ахнигай тир, Белижда яшамиш жезвай Рафик Сефербеговани иштиракна.
РикIел хкин, 2019-йисуз Дагъустандин “Леззет” санаторийда куьнуьчийрин международный форум кьиле фенай. Адан сергьятра аваз тухвай “2019-йисан лап хъсан вирт” конкурсда иштиракай Рафик Сефербегован виртIериз жюриди “Гзаф жуьрейрин цуькверилай кIватIнавай мичIи вирт” номинациядай сад лагьай чка ва къизилдин медаль ганай.
И конкурсдани Рафик Сефербегова вичи гьасилзавай вирт вини дережадинди тирди тестикьарна.
Р.Сефербегован гафарай малум хьайивал, “Дагъустандин хъсан вирт-2022” конкурсда иштиракзавай виртIериз къимет гун патал кьве жюри авай. Абурукай сад пешекарринди ва муькуьдини мярекатдиз килигиз атанвай тамашачийрин арадай хкянавайди тир. Жюридин иштиракчийри, нумраяр алай къапара авай виртIер дадмишиз, баллар эцигзавай.
Нетижаяр кьурла, вири мягьтел хьана. Рафик Сефербегован кьве виртIедизни — “Гзаф жуьре цуькверилай кIватIнавай мичIи вирт” ва “Дагъдин гьар жуьре цуькверин экуь вирт” номинацийрай — гьам пешекар куьнуьчийри, гьамни иштиракзавайбуру виниз тир къимет гана.
Рафик Мирземетовича вичи гьасилнавай бегьердиз вини дережадин къимет гайи вирибуруз сагърай лагьана.
Р.Сефербегов куьнуьчивилин 40 йисан стаж ва тежриба авай лап хъсан пешекар я. Ам са шумудра конкурсрин гъалибчини хьана. Гилани ам секиндиз акъвазнавач. Генани хъсан продукция гьасилунин мураддалди ам и рекьяй вичин юлдашрихъ галаз санал чIижерин цIийиз акъатзавай азаррин вилик пад кьунин, и рекье абур сагъардай цIийи тежрибаяр ишлемишунин ва хейлин маса месэлайрал машгъул я.
Чна Рафик Сефербеговаз цIийи агалкьун рикIин сидкьидай мубаракзава.
Къагьриман Ибрагьимов
