25-январдиз Ахцегьа, Зегьметдин Игит Саимат Ферзалиевадин тIварунихъ галай куьчеда, адан тIвар эбеди ийизвай мемориалдин махсус кьул ачухунин митинг кьиле фена. Мярекатда райондин кьиле авайбурун, жемиятдин тешкилатрин векилри, адан багърийри, агьа­лийри ва гзаф масабуру иштиракна.

Игитдин уьмуьрдин рекьикай гаф рахуналди, митинг райондин культурадин управленидин начальникдин заместитель Сулейман Сулейманова ачухна. Сифте гаф и куьчедин агьали, зегьметдин­ ветеран, вичи и кардик кьил кутур гьуьрметлу агъсакъал Керем Керемоваз гана.

— И куьчедал машгьур багъманчи, Зегьметдин Игит рагьметлу Саимат Ферзалиевадин тIвар алаз хьунал чна, ина яшамиш жезвай жемятди, дамахзава. Лайихлу касдин тIварунихъ галай куьче лайихлу гьалдани хьана кIанда эхир. Гьавиляй чна чи къуватралди ва талукь тир карханайриз куьмекуналди ядни, газни гъана, къирни цана, экверни туна. Куьче чешнелуди, гьатта шегьердиндаз ухшамишди хьанва. Анжах са нукьсан авай: Игитдин тIвар алай куьчеда и кар къалурзавай кьул авачир.  Ам вирибуруз аквадай чкадал лайихлудаказ раиж авун патал ингье гила чна вижевай кьулни эцигнава. Чаз вири и крара куьмекай, чи кIвалахрал гуьзчивал авур райондин ва Ахцегьрин хуьруьн кьиле авай ксариз­,  муниципалитетдин эцигунрин сад тир заказчик, идарадин начальник Сердер Моллалиеваз, эцигунрин инженер Сейфуллагь Агьмедоваз, УЖКХ-дин пешекар Абдурагьман Эфендиеваз сагърай лугьуз кIанзава. Еке зегьмет чIугур магьледин итимар тир Амер Пашаеван, Максим Ражабован, Асвар Асварован, гьакI жегьилрин тIварарни кьун кутугнава. Кьилинди, чалай магьледин агьалийрин арада гьуьрмет артухариз, жегьилриз бубайрин мел-бигер хьтин хъсан адетар чириз алакьна. И мярекатдин иштиракчиярни сагърай. Ихьтин баркаллу краралди къе чна Саимат Ферзалиевадин руьгь шадарнава. Рагьмет хьурай вичиз.

— Алай вахтунда им Ахцегьа жемятди­ кьил кутуналди ва куьмекдалди чешне­луди хьанвай сифте куьче я. Къуй амайбурни чпин куьчеярни магьлеяр гуьнгуьниз хкиз эгечIрай. Чнани чи патай лазим куьмекар ийида, — лагьана Ахцегьрин адмистрациядин кьил Мурад Эфендиева.

Саимат Ферзалиевадин багърийринни мукьва-кьилийрин патай микрофондихъ адан руш Аният Исрафилова атана. Мегьрибан диде рикIел хкунихъ галаз санал Анията игит дишегьлидин – гзаф аялрин дидедин экуь къамат эбеди авунай вичин шиирдалди чухсагъул лагьана.

Митингдал хуш келимаяр лагьайбурун арада С.Ферзалиевадин хцин свас Зумрият Ферзалиева, Ахцегьрин 1-школадин муаллим Дагмара Пашаева, Огни шегьердин хуьруьн майишатдин профколледждин Ахцегьрин филиалдин муаллим Назир Ханагьмедов, райондин дишегьлийрин советдин председатель Таира Муспагьова, Ахцегьрин тарихдин музейдин директор Агьмед Дагъларов ва масабур авай. Межлисдал райондин искусствойрин школада кIел­за­вай ру­шари “Ахцегьрин багълар” кьуьл тамамарна.

Ахпа Мурад Эфендиевани Саимат Ферзалиевадин хтул Мадина Ражабовади рикIел хуьнин кьулунилай перде алудна. Мярекат иштиракчийри анал цуьквер эцигуналди, кIватI хьанвайбуруз ичер гуналди давам хьана.

Куьруь къейд.

Саимат Керимовна Ферзалиева — советрин девирда Ахцегьа Къ.Агъасиеван тIва­рунихъ галай колхозда, гуьгъуьнлай “Ахтынский” сов­хозда хуьруьн майишатдин кIвен­кIвечи, багъманчивилин бригададин бри­гадир, Социализмдин Зегьметдин Игит.

1925-йисуз Ахцегьа зегьметкеш чIехи хизанда дидедиз хьана. Ватандин ЧIехи дяве башламишай 1941-йисуз 7-класс куьтягьай руш 16 йисан яшда аваз колхоздин производствода зегьметдин уьмуьрдиз шерик хьана. Дяведин ва адалай гуьгъуьнин четин йисара ада зегьметда чешне къалурна. Ферзалиевадин бригадади районда сифте яз емишрин багълариз авиациядин куьмекдалди дарманар яна. Адан регьбервилик кваз гьар са гектардай 800 центнердив агакьна емишар кIватIна.

1966-йисан 30-апрелдиз С.Ферзалиева Социализмдин Зегьметдин Игитвилин тIварцIиз лайих­лу хьана ва адаз Ленинан орден, “Мукални КIу­та­” къизилдин медаль гана. “Маяк Саи­мат” мани арадал атунихъ вичин бине авайди я. 1963-1967-йисара С.Ферзалиева РСФСР-дин Верховный Советдин депутатвиле, 1966-йисуз КПСС-дин ХХIII съезддин делегатвиле ва Даг­обкомдин членвиле хкяна. 1995-йисуз 70 йисан яшда аваз Зегьметдин Игит дишегьли рагьметдиз фена. Социализмдин Зегьметдин Игит, Ленинан ордендин сагьиб Саимат Керимовнадин 2025-йисуз 100 йис жезва.  Юбилей лайихлудаказ кьиле тухун ва Игитдиз гуьмбет эцигун патал гьазурвилер акунив гиламаз эгечIун кутугай кар жеда.

Дашдемир Шерифалиев