28-январдиз Дагъустан Республикадин Гьукуматдин Председателдин заместитель Нариман Абдулмуталибов кIвалахдин рекьяй Дербент райондиз мугьман хьана. Ам райондин кьил Мавсум Рагьимовахъ ва райондин администрациядин пешекаррихъ галаз санал районда 311 га ципицIлухар кутуниз талукь инвестпроект кьилиз акъудзавай мулкунал фена, ана кIвалахар кьиле физвай гьалдихъ галаз таниш хьана.
Алай вахтунда генеральный пудратчиди и мулкунал агъадихъ галай кIвалахар кьиле тухванва: 95 га чил дериндай къарагъарнава, чиликай артухан кьеж хкудун патал эгъуьннавай 8 км мензилда авай хвалар лиледикай ва зирзибилдикай михьнава. КIвалахар вилик тухун патал ана ципицIар кутунин ва къелемрихъ гелкъуьнин, дигидай цин вир туькIуьрунин, чилин участокриз стIал-стIал яд гунин ва чиликай артухан кьеж хкудунин месэлайриз талукь рабочий проектар гьазуриз гъиле ава.
Алай йисан гатфарин календардин планда къалурнавайвал, ципицIрин къелемар кутаз эгечIда.
Н.Абдулмуталибова райондин кьилихъ ва талукь работникрихъ галаз инвестпроектар вилик тухунин гележег веревирдна ва гьял хъувуна кIанзавай месэлаяр къейдна.
Къагьриман Ибрагьимов
