И йикъара Украинада кьиле физвай военный махсус серенжемда мад чи кьве ватанэгьли кьегьалвилелди телеф хьана. Абурукай сад Ахцегь райондин Смугъулрин хуьруьн агьали, старший лейтенант Аваз Мегьамедович Агъакишиев я. 2014-2019-йисара Костромадин военный академияда кIелай ада вичин къуллугъ Приморский крайда Лесозаводск шегьердин аскервилин 58079 частуна мотострелковый взводдин командирдин къуллугъдилай башламишна.
2022-йисан гатуз ам махсус серенжем кьиле физвай чкадиз рекье туна. Ина ада старший лейтенантдин чинда аваз къуллугъна. Аваз Агъакишиев аскервилин кьинез ва вичин аскервилин буржи тамамаруниз эхирдал кьван вафалу хьана. Адан 26-йис тир.
Кьвед лагьайди Мегьарамдхуьруьн райондин Азадогъли хуьруьн агьали Шекихан Мегьтиханович Керимов я. Ада гьуьлуьн пияда кьушунра къуллугъзавай. Амни Украинадиз акъатна. Шекихан Керимова командованиди вичин хиве тур вири везифаяр эхиримжи нефесдалди намуслувилелди кьилиз акъудна. Адан 24 йис тир. Ам хайи хуьре кучукнава.
“Лезги газетдин” редакциядин коллективди телеф хьанвай аскеррин хизанриз, дериндай хажалат чIугунивди, башсагълугъвал гузва. Ватан патал чанар гайи кьегьалрин экуь къаматар халкьдин рикIера амукьда.
«Лезги газет»
