Такабурлу ва къадим лезги халкьдихъ, жуьреба-жуьре рекьерай гьа гьисабдай яз дуьньядин спортдин кесерлу майданрани чIехи агалкьунар къазанмишнавай машгьур пагьливанар гзаф ава. Абурун жергеда вичин ери-бине СтIал Сулейманан райондин Кьасумхуьрелай тир, алай вахтунда Белоруссияда яшамиш жезвай грекринни римлуйрин жуьреда кьуршахар кьунай кьве сеферда дуьньядин чемпион Алим Селимова гьахълудаказ кьетIен чка кьазва.

Къейд: Алим 1983-йисан 26-январдиз Кьасумхуьрел Максим ва Саимат Селимоврин хизанда кьуд лагьай велед яз дидедиз хьана. Адан вад йис хьайила, дах рагьметдиз фена. Веледриз, лугьудайвал, бубавални дидевал школада муаллимвиле кIва­лах­за­вай дидеди авуна.

КIуьд йисан яшда авайла, Алим азаддиз кьуршахар кьунал машгъул хьана. И кардиз адан сифте тренер хьайи Юрий Къурбанова ва вични спортдин и жуьредал машгъул жезвай, гуьгъуьнлай тренер хьайи чIехи стха Муслима екез таъсирна.

9-класс куьтягьай Алим Селимов Дагъус­тандин промышленностдинни экономикадин колледждик экечIна. Инани ада спорт­дал ри­кIивай машгъул хьун давамарна. Адакай жа­ванрин арада Дагъустандин кIвенкIве­чи­вал патал ва республикадин са шумуд турнирдин чемпион хьана, ада Россиядин акъажунра иштиракна.

Гьелбетда, чIехи дережада тухузвай турнирра иштиракун ва анра вичин алакьунар къалурун патал куьмек тахьайвиляй А.Селимовал четинвилерни ацалтна. И кар кьа­тIай са дустуни Алимаз Белоруссиядин Гомелдин областдин Мозырь шегьерда Къурушрин хуьряй тир вичин халу Малик Энжиевич Эскендарова грекринни римлуйрин жуьредай кьуршахар кьунай тренервиле кIва­лахзавайдакай лагьана ва адан патав фин меслят къалурна.

Гьа икI, алакьунар авай жегьил Белоруссиядиз акъатна. 1999-йисалай ам Малик Эскендарован гъилик олимпиададин резерв патал­ жегьил пагьливанар гьазурдай Гомелдин махсус школада кьуршахар кьунал машгъул хьана. Гуьгъуьнлай Алим “спортдин тре­нер” пеше­дай олимпиададин резерв патал пагьли­ванар гьазурдай Гомелдин училищедик экечIна.

А.Селимова жегьилрин арада ва Белоруссиядин кIвенкIвечивал патал 2002-йисуз тухвай хейлин  акъажунра гъалибвилер къачуна.

Белоруссиядин хкянавай командадик кваз чи ватанэгьлиди гуьгъуьнлай грекринни римлуйрин жуьреда кьуршахар кьунай Поль­шадин кIвенкIвечивал патал кьиле тухвай ачух акъажунра иштиракна. Аниз Россиядай, Украинадай, Чехиядай, Великобританиядай 200-далай виниз пагьливанар атанвай. Алим Селимован заланвилин категориядай (84 кг) турнирда чпин къуватар 28 спортсменди ахтармишна. Алима турнирда 1-чка кьуна ва Польшадин чемпионвилин тIвар къачуна.

2005-йисуз Белоруссиядин хкянавай командадик кваз Алим Селимова Венгрияда кьиле фейи дуьньядин чемпионатда иштиракна. Финалда Россиядай тир Европадин ва Олимпиададин чемпион Алексей Мишинан винел гъалибвал къачуналди, чи кье­гьал­дикай дуьньядин чемпион хьана.

Грекринни римлуйрин жуьреда кьуршахар кьунай милли командадин спортсмен-инструктор яз, 2006-йисуз А.Селимоваз “Зегьметда къазанмишнавай агалкьунрай” медаль гана.

2009-йисуз А.Селимова Ф.Скоринадин тIва­рунихъ галай Гомелдин госуниверситетдин физкультурадин факультет куьтягьна. Ар­­­миядин жергейра къуллугъ авурдалай гуьгъуьниз чи машгьур ватанэгьлиди Гроднодин госуниверситетдин социологиядин факультетни заочнидаказ  акьалтIарна.

2011-йисуз Алим Селимова Стамбул шегьердин “Синан Эрдем Даум” спортдин аренада грекринни римлуйрин жуьреда кьуршахар кьунай кьиле фейи дуьньядин чемпионатда иштиракна ва 84 килограммдин заланвал авайбурун арада кьвед лагьай сеферда дуьньядин чемпионвилин тIвар къазанмишна.

РикIел хкин: Алим Селимов спортдин и жуьредай дуьньядин чемпионвилин тIвар къачунвай сад лагьай дагъустанви я. Гьайиф­ хьи, сагъламвилин месэла себеб яз, Алимавай Китайдин Пекин шегьерда кьиле фейи Олимпиадада иштиракиз хьанач.

А.Селимов Белоруссиядин са шумудра  чемпион, военный рекьяй къуллугъчийрин  арада кьиле фейи дуьньядин чемпионатдин призерни я.

Спортдин рекье къазанмишай зурба агалкьунриз килигна, Алим Селимоваз 2012-йисуз Беларуссиядин спортдин лайихлу мастервилин тIвар гана.

2015-2018-йисара А.Селимова Минскда футболдин “Динамо” клубдин генеральный директорвиле кIвалахна. 2018-йисалай ада “Динамо-Брест” клубдин футболдин академиядин директорвилин везифаяр кьилиз акъуд­зава. Гьа са вахтунда ам грекринни римлуйрин жуьреда кьуршахар кьунай Белоруссиядин хкянавай командадин тренерни я.

А.Селимова, хизанни галаз Гомель шегьерда яшамиш жезватIани, Дагъустандихъ, хайи райондихъ галазни сих алакъа хуьзва. Ам “СтIал Сулейманан райондин гьуьрметлу агьали” тIварцIин сагьибни я.

Хайи югъ мубарак авуналди, чаз Алим Селимовахъ спортдин рекье, кIвалахда мадни еке агалкьунар, мягькем сагъламвал, хизанда хушбахтлувал хьана кIанзава.

 

Хазран  Кьасумов