“Хатасуз ва ерилу рекьер” милли проектдин сергьятра аваз  2023-йисуз  Дагъустанда тахминан  59,5 километр шегьре рекьер ремонт­да. И макьсаддалди 2 миллиардни 247 миллион манат  чара авунва, абурукай 1 миллиардни 67 миллион манат­ федеральный бюджетдин гьисабдай я, хабар гузва чаз респуб­ликадин транспортдин ва рекьерин майишатдин министерстводин  информациядин къуллугъди.

Малум хьайивал, рекьер ремонт авунин кIвалахар кьуд муниципалитетда кьиле тухуда. Алай йисуз милли проектдин кар алай объектрикай сад Мегьарамдхуьр-Ахцегь-Рутул  шегьредин 40 ла­гьай километрдилай 54 лагьай километрдал кьван мензил хьанва. И рекьин 14 километр ремонтда. РикIел хкин, ада Докъузпара, Ахцегь ва Рутул районар чеб чпин арада, гьакIни  республикадин рекьерин асул сетдихъ галаз алакъалу ийизва ва и районар экономикадин жигьетдай виликди тухунин карда важиблу роль къугъвазва.

Махачкъаладин агломерацияда, хабар гузвайвал, рекьерин пешекарри  милли проектдин сергьятра аваз 19 объектдал  ремонтдин кIвалахар тамамарда. Чкадин важиблувал авай 12 километрдин рекьер лазим тир къайдадиз хкида.

Хабар гузвайвал, 2022-йисуз “Хатасуз ва ерилу рекьер” милли проектдин сергьятра аваз региондин важиблувал авай пуд рехъ туь­кIуьр хъийидайла, цIийи технологияр ишлемишна.

Чи мухбир