Макъаладиз ихьтин кьил гуниз зун ихьтин себебри мажбурна. Виликрай чаз лап мукьва къунши республика тир Азербайжан гила кьилдин гьукумат хьанва. Адахъ галаз Дагъларин уьлкведин лап мукьва алакъаяр авайди тир. Анин шегьерриз, районриз, хуьрериз, ярар-дустарин, чирхчиррин патарив лап регьятдиз фена хквез жезвай. Иллаки мел-мехъеррик гзаф фидай. Герекзавай пек-партал, къаб-къажах, сусаз къизилдинни гимишдин безекар, шаларни перемар, кIвачин къапар ва маса затIар Бакудай, Худатдай, Хачмаздай, КцIарай ва масанрай къачуна, рикI секин ва архайин яз хкведай. На лугьуди, вун инал алай Белиждиз ва я Дербентдиз фена хквезва, гьакьван регьятдиз фена хквезвайди тир. Дерди туькIуьн тавуна, хтай кас жедачир.
Азербайжанвиярни чун хьтин инсанар, са адетар, са ацукьун-къарагъун гвай шад инсанар я. Гьавиляй аниз артистар, музыкантар акъатайла, абуру цIийи алатарни, абур ишлемишизни чирна хкведай. И крари яратмишдайбурукни шадвални гьевес кутадай. Чи пата азербайжанвийрин манийрихъ, макьамрихъ, ашукьрин дастанрихъ, тIвар-ван авай, дуьньядиз машгьур хьайи зурба артистрин — Рашид Бейбутован, Зейнаб Ханларовадин, Ислам Рзаеван ва масабурун манийрихъ, чIагъанчи Афтандилан макьамрихъ гзаф рикI алаз яб акалдай. Гьайиф хьи, къе япарихъ абурун ширин сесер галукьзамач. Гьайиф чIугуниз мажбур жезвай кар я халкьарин, яни кьве республикадин арада интернациональный дуствал мягькем хьанвай вахтар алатна фин. РикIел хквезва, а вахтара кIвалера авай радиойрай гьар юкъуз са сятда, киш — базардин йикъара гьадалайни гзаф вахтунда Бакудай лап хъсан артистрин, бажарагълу музыкантрин концертар гудай адет авайди тир. Абурун вахт хьайила, гъилевай кIвалахни акъвазарна, чун радиодин патав къведай, яб гудай. Галатун рикIелай алатдай, гуьгьуьлар ачух хьана, гьевесдивди мад кIвалахдив эхгечIдай. Гьайиф, дуствилинни тербиядин гзаф адетар квахьна, амач. Чи чкадин телевиденидиз пуд канал аватIани, алава яз республикадин са шумуд канал кардик кватIани, Азербайжандин концертар кьериз — цIаруз кьванни гузвач. Къакъатунар, чукIурунар хьаначиртIа, ихьтин чIуру крариз рехъ тагайтIа, “Самур-Дивичи канал” манидин сес, шак алачиз хкаж жедай. Яраб газет кIелзавай юлдашрихъ гьихьтин фикирар аватIа?
Райсудин Набиев
