Алукьнавай йисуз винидихъ чпикай лагьанвай вири конкурсар къуватда амукьда. Амма бязибурун тематикада дегишвал гьатда. ИкI, РФ-дин Президент Владимир Путинан къа­рардалди 2023-йис Россияда муаллимдин ва насигьатчидин йис яз малумарнава. Идакай Президентди  гьеле 2021-йисуз лагьанай: “Муаллимдин пешедин важиблувал жемият патал  акьалтIай екеди хьунин лишан яз, Россиядин педагогикадин бине кутур ксарикай сад тир Константин Дмитриевич Ушинский хайидалай кьулухъ 200 йис тамам жезвай 2023-йис чи уьлкведа  муаллимриз ва дуьз рекье твадай тербиячийриз  талукьарда, ам Муаллимдин, Педагогдин  йис жеда”. Санлай къачурла, и къарардин макьсад муаллимдин пешедин важиблувал къейд авун, и пеше виниз тир дережадиз акъудун я.

Талукь яз,  «Лезги газетдин» “Йисан месэла” конкурсни муаллимди, регьберди, тербиячиди къугъвазвай ролдихъ, ада кьазвай чкадихъ галаз алакъалу я.  Пуд чкадикай ибарат тир и конкурсдин премийрин кьадар виликдай хьиз амукьда. 3000 манат — виридалайни хъсан очеркдай,  2000 манат — публицистикадин макъаладай ва  1000 манат —  лап хъсан  шиирдай. Текстинин кьадар  4 чарчелай артух  ва шииррин кьадар 5 бендинилай тIимил тахьун лазим я.

Юмординни сатирадин куьруь жанрайрин “ИкIни жеда кьван”  ва уьмуьрдин рехнеяр арадай акъудиз  куьмек гузвай  “Хъсан шикил” конкурсарни  давамарзава. И конкурсра гъалиб хьайибуруз гьардаз 1000 манат премия ва дипломар гуда. Инал заз  “Хъсан шикил” конкурсдикай  кьетIендаказ лугьуз кIан­зава.  Алай вахтунда инсанрив саки виридав смартфонар­ гва ва абурун куьмекдалди рикI алаз шикиларни язава. “Хъсан шикил” конкурсда иштиракун патални герекди художникдин тегьерда гуьзел шикил чIугун ваъ, жув яшамиш жезвай чкайра, гьар камуна аквазвай нукьсанар, къайдадик квачир, туьх­кIуьрна, фикир желбна кIанзавай чкаяр, гьич тахьай­тIа, телефондай шикил яна, редакциядиз рекье тун я. Гьатта текстни лазим туш — анжах чкадин тIвар кхьин ва нукьсандиз талукь куьруь делилар агакьарун бес я.

“Гьевесламишдай премия” — 1000 манат ва диплом. Ам чна са шумуд касдиз  гузвай дуьшуьшар тIимил туш.  И кар патал хайи газетдин чинал гьар жуьредин  хци месэлайрай макъалаяр гъана кIанда.

“Йисан мухбир” конкурс — 3000 манат. И премиядалди “Лезги газетди”  виридалайни активнидаказ  кхьизвай,  гьар жуьредин месэлаяр къарагъарзавай, абурал фикир желбзавай мухбиррин зегьмет къейдзава.

Жаванрин ва  жегьилрин арада   бажарагълубур хкягъунин  мураддалди малумарнавай “Литературадин эсеррин конкурсдин”  пуд премияни къуватда ама.

Сад лагьайди — виридалайни хъсан гьикаядин эсер. И конкурсда чпин яшар 35 йисалай виниз туширбурувай иштиракиз жеда. Кьвед лагьайди — республикадин студентрин арада “Виридалайни хъсан очерк” кхьинай. Пуд лагьайди — мектебра кIелзавай  аялрин арада “Виридалайни хъсан шиир” кхьинай. Темаяр ачухбур  я.

Конкурсрин гъалибчийрин агалкьунар пулдин премий­ралди (1-чка — 3000 манат, 2-чка — 2000 манат ва 3-чка — 1000 манат) ва «Лезги газетдин» дипломралди лишанламишда.

Ж.Саидова