Лезги халкьдин векилар тир гзаф гадайрикайни рушарикай азаддаказ кьуршахар кьунай, самбодай, дзюдодай, каратэдай, армрестлингдай ва спортдин маса жуьрейрайни неинки Дагъустанда ва Россияда, гьакIни дуьньяда машгьур спортсменар хьанва. Яваш-яваш абуру спортдин маса, чпиз “мукьва” тушир жуьреярни муьтIуьгъарзава. Конькийрал алаз авахьунай (конькобежный спорт) лезги руш Камила Ханбалаевади Россиядин чемпионвилин тIвар къачуни и кардин патахъай ачухдиз шагьидвалзава.
Камиладин диде-бубадин ери-бине СтIал Сулейманан райондай я. Руш Махачкъала шегьерда дидедиз хьана. Эхиримжи йисара ам Москвада яшамиш жезва, школада кIелзава, конькийрал алаз авахьунал машгъул жезва. Камилади уьлкведа жаван спортсменрин арада тухвай хейлин турнирра гъалибвилер къачуна. Ам международный турниррин гъалибчи ва призерни я.
Алатай йисан декабрдин вацра К.Ханбалаевади чIехи кьве турнирда иштиракна ва вичихъ спортдин и жуьредай еке гележег авайди къалурна. ИкI, Коломна шегьердин конькийрал алаз авахьунин центрада “Къизилдин конькияр” тIвар алаз кьиле тухвай Вирироссиядин акъажунра чи уьлкведин 32 региондай тир 13-15-йисан яшара авай 180-далай виниз спортсменри иштиракна. Акъажунрин программадик 500, 1000, 1500, 3000 метрдиз конькийрал алаз чукурун, многоборье ва маса жуьреяр квай.
Камила Ханбалаевади рушарин арада многоборьедин нетижайрай Россиядин чемпионвилин тIвар къазанмишна.
Гуьгъуьнлай чи таватди Россиядин хкянавай командадик кваз Россиядинни Китайдин жегьилрин хъуьтIуьн къугъунра иштиракна. Россиядин командадик, Камиладилай гъейри, Лалита Гарибян ва Анастасия Семёнова квай.
Къизилдин — 8, гимишдин — 8 ва буьруьнждин 9 медаль къачуналди, Россиядин командадикай къугъунрин чемпион хьана.
— Гуьгъуьнин сезондиз зун чIехи яшарин категориядал элячIзава, — лагьана Камила Ханбалаевади Россиядинни Китайдин хъуьтIуьн къугъунра гъалиб хьайидалай гуьгъуьниз журналистриз гайи интервьюда. — Ана командадин чукурун жеда — им зун патал цIийивал я. Тренировкаяр тухуда, алахъда, жуван рикI алай спортдин жуьредай мадни чIехи агалкьунар къазанмишиз чалишмишвалда.
Чаз соцсетрай жагъай делилралди, Камила Ханбалаева конькийрал алаз авахьунай ихьтин чIехи дережа къачунвай неинки сад лагьай лезги, гьакIни сад лагьай дагъустанви — “сифте чубарук” я.
Вахъ уьмуьрда ва спортда мадни еке агалкьунарни гъалибвилер хьурай, Камила!
Хазран Кьасумов
