Алай йисан 17-январдиз Дагъустан Республикадин Кьил Сергей Меликова Фазу Алиевадин 90 йис къейд авур ва Расул Гьамзатован йис кьиле тухуниз талукь тешкиллувилин комитетрин саналди тир заседание кьиле тухвана.
“Алай аямдин зурба кьве шаир, бажарагълувилелди сада-садаз артухан къуват гуз, са девирда яшамиш хьун аламатдин лишанрикай я”, — къейдна Дагъустандин Кьили, мярекат ачухдайла.
Юбилей къейд авунин нетижаяр
РД-дин культурадин министр Зарема Бутаевади лагьайвал, 2022-йисуз Фазу Алиевадин 90 йисан юбилейдихъ галаз алакъалу яз тешкилай вири мярекатар (цIийи тамашаяр, выставкаяр, конкурсар, фестивалар, шииратдин межлисар, ктабар чап авун, мемориалар ачухун ва рикIел аламукьдай маса вакъиаярни) тамамвилелди кьиле тухвана.
Россиядин 36 регионда векилханайрин ва ватанэгьлийрин куьмекни галаз 120 мярекат тешкилна. Гьа гьисабдай яз, са шумуд регионда “Лезгинка” ансамблди концертар гана, РД-дин милли музейди гьазурнавай “Дагъви дишегьлидин гуьрчег къамат” шикилрин выставкаяр ачухна, Фазу Алиевадин юбилейдихъ галаз алакъалу шииратдин межлисар тухвана. Кьулухъ Дагъустандин машгьур гуьзел чкайрин шикилар галаз Екатеринбург Фазу Алиевадин шикилри безетмишна. Дальний Востокда крайдин драмадин театрдин артистри Фазу Алиевадин шиирар кIелна. Шаирдикай фильм къалурна.
З.Бутаевади къейд авурвал, и зурба кIвалах государстводин ва муниципальный властдин органри, культурадин идарайри, вузри, жемиятдин ва жегьилрин организацийри, СМИ-ри, регионра авай векилханайри ва Фазу Алиевадин мукьва-кьилийри санал тешкилна, тухвана.
Нетижаяр кьуналди, Сергей Меликова шаирдин 90 йисахъ галаз алакъалу шадвилин мярекатар вини дережада аваз кьиле фейиди тестикьарна, иштиракай виридаз сагърай лагьана. Абурун арада авай: РД-дин “Шииратдин театр” ГБУ-дин директордин заместитель Ариза Батырова, Хунзах райондин культурадин отделдин начальник Жавгьарат Къайтмазова, Мамедкъаладин 2-нумрадин юкьван школадин ученица Залина Зейналбегова, региондин “Дагъустандин дишегьлийрин Союз” жемиятдин организациядин председатель Интизар Мамутаева ва масабур.
“Лезгинка” ансамблдин директор, Фазу Алиевадин хва Жамбулат Мегьамедова дидедин яратмишунриз еке фикир гунай вири дагъустанвийриз сагърай лагьана.
Сергей Меликоваз Славик Абдулаева чIугунвай шаирдин суьрет багъишна. Мадни Интизар Мамутаевади региондин Кьилив Фазу Алиевадин 90 йисаз талукь яз гьазурнавай юбилейдин “Ватан кIанивиляй” медаль вахкана.
Расул Гьамзатован йис кьиле тухуниз гьазурвилер
Мярекат давамаруналди, региондин регьберди къейдна: “Алай йисуз чи хиве мадни еке везифа ава — Дагъустандин халкьдин шаир Расул Гьамзатов дидедиз хьайидалай инихъ 100 йис тамам хьун ва и мярекат лап вини дережада аваз кьиле тухун”.
РикIел хкин, Сергей Меликова гайи и теклиф Россиядин Президент Владимир Путиназни хъсан акуна.
Алатнавай вахтунда Федеральный ва республикадин дережайра хейлин кIвалах тухванва. “Расул Гьамзатован медаль” туькIуьрнава.
Расул Гьамзатован йисаз талукь сифте мярекат 21-февралдиз Урусрин драмтеатрдин ЧIехи залда кьиле фида. Республикадин милли библиотекада гьар арбе юкъуз шаирдин чIалар хуралай урус чIалал ва Дагъустандин халкьарин чIаларал кIелдай проект кардик акатда, ам вири йисуз давам жеда.
Шадвилин кар алай мярекатар шаир хайи юкъуз — 8-сентябрдиз Махачкъалада ва Москвада, 28-сентябрдиз Государстводин Кремлдин Дворецда кьиле фида.
Ихтилат давамаруналди, РФ-дин Президентдин къвалав гвай РД-дин гьамишалугъ векил Владислав Толстюка лагьайвал, Дагъустандин векилханадин дараматда Расул Гьамзатован юбилейдиз талукьарнавай экспозиция эцигнава. Москвадин вузра тешкилдай мярекатар тайинарнава. Меркездин библиотекайри ктабрин выставкаяр, шаирдин яратмишунриз талукьарнавай межлисар тешкилда.
Россиядин государстводин библиотекада кьиле тухудай мярекатрикай генералный директор Вадим Дудади ихтилатна. Ада региондин Кьилив Россиядин госбиблиотекадин фондунай Расул Гьамзатован печатдиз сифте акъатай шиир авай “Большевик гор” газетдин копия вахкана.
Сергей Меликова къейдна хьи, кIелунин цIийи йисан сифте йикъарилай школайра линейкайрал Гьамзатован шиирар хуралай кIелун лазим я.
Заседанидин нетижайрай С.Меликова тапшуругъарни гана.
«Лезги газет»
