Дагъустанда авай Яшайишдин (Пенсийрин) фондунин (СФР) отделениди хабар гузвайвал, алай йисалай эгечIна гудай сад тир (единое) пособие цIийи ва алава пулдин такьатар туш, ада хизанриз виликдай гузвай са шумуд пособие эвезда, гьа гьисабдай яз 3-далай 17 йисал къведалди яшда авай аялар патал ва дарда авай кIвачел залан дишегьлийриз гузвайбурни сад садав агудда.

Эгер хизанди алай йисалай тайинарнавай сад тир пособидик квайбурукай  100 процентдин кьадарда аваз пулунин са гьихьтин ятIани алава куьмек (пособие) къачузватIа, ада цIийи арза гун герек туш — лазим тир кьван вахтуналди ам гун давам жеда. Анлай анихъ сад тир пособие патал арза гун лазим я. Хи­зан­ди пособие 50 ва 75 процентдин кьадарда аваз къачузватIа, абурувай 2023-йисан 1-январдилай сад тир пособие къачун патал арза гуз жеда, эгер чпиз виликдай тайинарнавайдалай виниз атун лазим яз гьисаб­за­ватIа.

“Сад тир пособие гьисабунин бинеда асул гьисабдай  3-далай 17 йисал къведалди яшда авай аялриз алава куьмек гунин къайда ава. Да­гъустанда сад тир пособие 446 515 хизандиз къведа. Ада виликдай алава куьмек яз гузвай са шумуд такьат санал агудда”, — къейд­зава СФР-дин РД-да авай Отделенидин регьбер Мегьамед Исаева.

Алава куьмекдин кьадар диде-бубадин доходдилай аслу я ва чи регионда яшамиш хьун патал тайинарнавай пулунин агъа кIанин кьадардин 50, 75 ва я 100 процент тешкилзава.­

Ватандиз къуллугъиз эвернавай ксарин такьатар абурун хизандин доход яз гьисабдач.

Сад тир пособие Дагъустанда гьар са касдал регионда яшамиш хьун патал тайинарнавай пулунин агъа кIанин кьадардилай тIимил агакьзавай хизандиз гуда. Алай йи­са­лай чи республикада и пулунин кьадар       13 081 манат я.

Пособие тайинардайла, мадни фикир гудай уьлчме — хизандихъ юзуриз жедай ва юзуриз тежедай (движимый, недвижимый) эменни хьун я. Мисал яз, гьар са хизандихъ са машиндилай артух хьана кIанзавач. ИкI, диде декретдиз экъечIнава, бубадиз къвезвай мажибдикай хизандин гьар са касдал яшамиш хьун патал тайинарнавай пулунин агъа кIанин кьадардилай тIимил агакьзава, амма хизандихъ кьве машин ава. Ихьтин дуьшуьшра пособие гудач.

Идалайни гъейри, хизанда авай зегьмет чIугваз алакьзавай гьар са касдихъ офи­циаль­­ный доход хьана кIанда. Эгер инсанди са­нани кIвалахзавачтIа, адаз пособие къвезвач.

— Государстводи анжах чпи чпиз куьмекзавай, яни зегьмет чIугвазвай, амма тIимил мажиб къвезвай ксариз куьмекзава. Инсандихъ официальный доход тахьунихъ кьабулиз жедай себеб хьана кIанда. Мисал яз, инвалид аялдихъ, яшлу касдихъ гелкъвезва, яргъалди больничный къачуниз мажбур хьанва ва я зегьметдин биржада акъвазнава, — алава хъийизва Дагъустанда авай Яшайишдин фондуни.

Инал лугьун кутугнава, дишегьли кIвачел залан хьун гила пособие къачудай мумкинвал гудай себебрик акатзава. Эгер арза гудай чIавуз дишегьли кIва­чел залан яз 12 ва адалай виниз гьафтеяр яз хьайитIа, мажиб авачиз хьуни пособие тайинаруниз маний­валдач.

РикIел хкин: сад тир пособие патал “Госкъуллугъар” порталда, Дагъустан Республикада авай Яшайишдин фондунин шегьерра ва районра кардик квай отделенийрин муьштерийрихъ галаз кIвалахдай къуллугъриз фи­налди ва я МФЦ-да арза гуз жеда. Яшайиш­дин­ фонд  — им виликан Пенсийрин фонд я.

Арза гузвай касдивай ам дуьз гун тIалаб­за­ва, лазим тир амай вири делилар фондунив (ведомствойрин арадин документооборотдин бинедаллаз) агакьарзава.

Рагнеда Рамалданова