2023-йис патал “Лезги газетдин” 10 ва адалай гзаф экземплярар кхьиз, пулдин такьатар редакциядив агакьарай вири рухвайризни рушариз чна рикIин сидкьидай сагърай, куь руьгьдин девлетар мадни артух хьурай лугьузва.
Агъадихъ чна абуруз ЦIийи йисан тебрикар рекье твазва. ТIварар алфавитдин къайда хвена кхьенва.
Дагъустандилай къеце
Абасов Мамедаз — Красноярск шегьерда эцигунрин холдингдин векилдиз:
А яргъал тир Сибирдай
Агакьариз гъил ачух,
АкI жезва чаз, гуьгьуьлда
Алахьзава гьуьл ачух!
Агъажан ва Рустам Адигуьзеловриз — Москвада яшамиш жезвай къурушви карчийриз:
Кар кутурла меркезда,
Квадарзавач чIал куьне.
Хуьзва халкьдиз хвавилелд
КIанивилин звал куьне!
Балакишиев Заураз — Краснодарда яшамиш жезвай вурварви карчидиз:
Хуьн къилихда милливал
Тушни себеб дамахдай!
ТIимил тахьуй садрани
Земземдин сел булахда!
Гьасанов Васифаз — Ярославлда яшамиш жезвай къурушви хциз — карчидиз:
Гьихьтин яргъал яргъара
КутуртIани гел куьне,
Тийиз жизви авара,
Хуьзва руьгьдин кьел куьне!
Керимов Арифаз — Москвада ФЛНКА-дин регьбердиз:
Генг майданра дуьньядин
ТIвар вине тваз Лезгидин,
Кар ийизва зурба тир,
Михьивал гваз гуьзгуьдин!
Магьсудов Алимегьамедаз — Нижний Новгородда яшамиш жезвай карчидиз:
Кефердихъай Кьибледихъ
Дуьзмишзава муькъвер чаз.
Нурар алаз жегьредин,
Багъишзава мехъер чаз!
Садикьов Максимаз — Краснодарда яшамиш жезвай карчидиз:
Себебралди гьар жуьре
КъакъатайтIан хуьруьвай,
Къакъудзавач гьич зерре
Чун паталди багъривал!
Эмиргъаев Альбертаз — Алтайда яшамиш жезвай карчидиз:
Дагъустандай Алтайдиз
Куьруь хьанва мензилар.
Хуьзва гьикьван къулайдиз
Милли руьгьдин къизилар!
Дагъустандин шегьеррани районра
Докъузпара райондин Къаракуьре хуьруьнви Магьмудов Сажидаз — девирдин карчидиз:
Сур девиррин тарихар
Хуьзвай хуьруьн рухвайри
ТIимилардач лайихар
Хас тирвалди архайриз!
Дербентда
Исмиханов Рамизаз — девирдин карчидиз:
Гьуьрметдинни хатурдин
Артухариз гьавизар,
КIвалахзава абурдин
Чи Лезги хва Рамиза!
Межидов Абилаз — РД-дин лайихлу юристдиз, писателдиз:
Хва я вири дидейрин,
Дерт алуддай бендейрин.
Даим мердвал рикIева
Битаввал хуьз бинейрин!
СтIал Сулейманан районда СтIалрин хуьрера
Эльдаров Муслимаз — девирдин карчидиз:
Мердвал ава Куьредихъ
Гекъиг тежер жуьредин
Руьгьдин къул хуьн паталди
Гъетер кIватIда жегьредин!
Яралиев Имамаз — жемиятдинни сиясатдин зурба деятелдиз, РД-дин Халкьдин Собранидин депутатдиз:
Гьар са кIвалах тамамдиз
Бахш ийида илгьамдиз.
Бязибурун бедвилер
Буьнжуькьарда айгьамрив.
ТIварар кьамир лагьай куьмекчийриз — меценатриз:
Женгинава медени
Хуьз чи руьгьдин мескенар.
Гьар са кьегьал, декIени,
Жен гьа ихьтин жуьгьенар!
Каспийскда
Агьмедов Тагьираз — “КаспийТеплоСервис” ООО-дин гендиректордиз:
Ава ажеб устадвал,
Шегьердиз гуз абадвал.
Гьар хизандив агакьрай
Дердийрикай азадвал.
Алияров Маратаз — РД-дин Халкьдин Собранидин депутатдиз, карчидиз:
Руьгьдин нурлу такьатар
Багъишда чаз савкьат яз.
Парабуруз чир хьанва
Инкъилабчи Марат яз.
Гьажибубаев Назираз — “Дагдизель” заводдин коммерческий директордин заместителдиз:
Карханадин тажир я.
Агалкьунар надир я.
Чун паталди гъил ачух,
РикI михьи хва Назир я!
Къулиев Рамазаназ — къурушви хциз:
Чан эцигда чил патал,
Акъатдайд туш гъил патаз.
Руьгьдин рузи хуьдайла,
Гъида ацIай гьуьл патав!
Магьамдалиев Яралидиз — теплосетрин зегьметчидиз:
Чан гъида терс ракьарал,
Лаш илигда такьарал.
Эквни, чимни къулайвал
Агакьариз халкьарал.
Фатуллаев Имамудиназ ва Азизов Абдуллагьаз — Дуьм-дуьз механикадин заводдин гендиректордиз ва кьилин бухгалтердиз:
Кьве хвани я Кьилинбур,
Гьакьван къени КIвалинбур.
Гьуьрметарни гьамиша
Жеда халис Къуьлуьнбур!
Яралиев Мурадаз — цилингви хциз, девирдин карчидиз:
Хайи чIалан ирсинин
Къайгъудар я ам хуьнин.
Руьгь хъуьреда акурла
Рагъ хьиз михьи, нисинин!
Махачкъалада
Агьмедов Жейгьуназ — Махачкъалада авай имам аш — Шафиидин тIварунихъ галай мискIиндин имамдиз:
Кутач кардик гьарамди!
Фашалвал жеч граммдин!
Мешребдава гьавиляй
Везифаяр Имамдин!
Азаев Жабираз — “Къуруш” центрадин сагьибдиз:
Жувандини патанди,
Гьакъикъатни тапанди,
Ахтармишиз алахъда
Вичиз муьтIуьгъ къапандив.
Асаханов Шагьпазаз — эминхуьруьнви карчидиз:
Лишан ала паквилин,
Терез хуьда гьахъвилин.
Фад алудда рекьелай,
АкуртIа са шак вилиз!
Баламирзоев Назимаз — ДГТУ-дин ректордин везифаяр тамамарзавай экономикадин илимрин кандидатдиз:
МуьтIуьгъ хьурай илимдин
Мадни дерин гьуьлер ваз.
Мублагь хьурай къалиндиз
Кам эцигдай чилер ваз!
Велиев Эзединаз — ДГУ-дин математикадин факультетдин доцентдиз:
Михьивилиз — къвед хьтин!
Экуьвилиз — гъед хьтин!
Инанмиш хьухь, акунач
Уьмуьрда чаз кьвед ихьтин.
Гьамидов Фахрудиназ — кьурагьви хциз, къуллугъчи меценатдиз:
Рухваяр мерд Гиярди
Гана, гузва пайгардиз.
Агакьзава гьар чIавуз
Дерт алайдан дидардиз!
Къадималиев Мегьамедзакираз — “Дагъустан” агрохимкъуллугъдин гендиректордиз:
Инад кьада азарриз,
Гурвал гуда базарриз!
Са жуьрени шейтIанрив
Тадач руьгьдиз назариз!
Магьмудов Фаргьадаз — “Махачкъала” автоцентрадин сагьибдиз:
Сагъзавайла моторар,
Гьар садан руьгь, рикI шад я.
Сагьиб ихьтин суварин.
Чи устад хва Фаргьад я!
Маллаев Жарулагьаз — РД-дин МЧС-да “РД-дин цIаяр хкадарунин къуллугъ” ГКУ-дин регьбердиз:
ЦIай хьурай чи жигерда,
Руьгь хкажиз бигерда!
ЦIай тахьурай курвилин
Сириставри зенгердай!..
Мегьамедкеримов Мурадаз — А.Гьасанан тIварунихъ галай медениятдинни марифатдин центрадин директордин куьмекчидиз:
ТIимил тежез къуватар,
Хуьз чи руьгьдин савкьатар,
Пара хьурай майданра
Мергьямат гвай Мурадар!
Насрудин ва Рамиз Мирзегьасановриз — юкьван школайрин директорриз:
Сердерар чи саваддин,
Дуьнья ийиз абадди,
Гьар са югъ квез атурай
АцIайвилиз устадди!
Пирмегьамедов Разимаз — карчидиз:
Авай чIавуз лазимвал
Хвена руьгьдин лигимвал,
Агакьарда улакьар
Вине твадай Итимвал!
Рамазанов Рамазаназ — цIаяр кьуниз акси къурулушдин кьилин пешекардиз:
Гьалт тавурай цIаяр чал,
ТIурфанарни къаяр чал!
Мублагьвилин бул хьурай
Багъишзавай паяр чаз!
Салагьов Агъаметаз — ДГТУ-дин преподавателдиз:
Эй, гьуьрметлу игъирви,
Шегьре хьурай жигъир ви!
Руьгьдиз рекьер хуьдайла,
Мерд ачух хьуй кьве гъил ви!
Тажибов Жамалдиназ — меценатдиз:
Гьар са хва чи жамалдин
Къудратлу хьуй камалдиз!
Кар-кеспидин кьилеваз,
Фу нез, яд хъваз гьалалдин!
Шагьбанов Низамаз — 13- гимназиядин муаллимдиз:
Аскервилин чирвилер
Несилдиз гуз тирвилив,
Тазвач четин суалар,
Я шак гъидай сир вилик!
Эмиров Багьадиназ — ДГУ-дин гьисабунрин центрадин доцентдиз:
“Лезги газет” кхьиниз
Вич гьамиша куьмек я.
Лезги намус хуьнуьзни
Лап халисан дирек я!
Эседов Адилагьаз — карчидиз:
ГъалатI течиз гьич ади,
Куьмек агакьарда тади.
Рехъ ачухда чIехи жер
Аялдизни гьа надинж.
Эсетов Азединаз — ДГМУ-дин доцентдиз, Халкьдин духтурдиз:
Руьгь гузвай хьиз гьуьлуь ваз,
Ава чIехи сейливал.
Хазина хьиз ачух я
Гьар са карда милливал!
Эфендиев Маилаз — МЧС-дин ветерандиз, шаирдиз:
Айгьамдивни тарифдив
Кар тухуда лайихдиз.
Гьавиляй я, жагъидач
Себеб, суал синихдин.
Юнусов Хидир-Зулданаз — МВД-дин ветерандиз, РД-дин лайихлу художникдиз:
Шаир я вун рангарин,
Чуьллеринни рагарин.
Къелем гъиле хци я,
Рагъулвилер кукIвариз.
Жувазни:
Къул хуьн патал миллетдин
Герекди я зегьмет ви.
Манатривай гьисаб жеч
Агакьзавай гьуьрмет ви.
“Лезги газетдин” редакциядин теклифдалди
тебрикрин цIарариз къуват гайиди Мерд Али Жалилов я.
