9-январдиз Дагъустандин Кьил Сергей Меликова РФ-дин Президентдин меслятчи Руслан Эдельгериевахъ галаз гуьруьш кьиле тухвана. Идакай “Лезги газетдиз” РД-дин Кьилин пресс-къуллугъди хабар гана.
Гуьруьшдин вахтунда абуру республикади уьлкведин регьбердин тапшуругъар кьилиз акъудуниз ва гьакIни милли проектризни государстводин программайриз талукь месэлаяр веревирдна.
Санлай къачурла, Руслан Эдельгериева республикада кьиле тухузвай кIвалахриз хъсан къимет гана: “Хъсан патахъ хьанвай дегишвилер къейд ийиз кIанзава: рекьер, куьчеяр тарифдай гьалда ава, аялар патал цIийи майданар туькIуьрзава, кьакьан гьавайрин кIвалерин гьаятар аваданламишзава… Чаз куь алахъунрин ва къазанмишзавай нетижайрин къадир ава”, — лагьана ада.
Абуру веревирд авур месэлайрин арада гьакIни Ахцегь районда эцигзавай муниципалитетдин кьилин духтурханани авай. Сергей Меликова хабар гайивал, эцигунрихъни монтаждихъ галаз алакъалу кIвалахар акьалтIарнава. Гила медико-технический тапшуругъар кьилиз акъудзава.
Чи мухбир
