Ризван Мурадов республикадин энергетикадин
ва тарифрин министрдин къуллугъдикай азаднава
Дагъустанда энергетикадин ва тарифрин министр дегиш хьанва. Республикадин Кьил Сергей Меликован Указдалди и къуллугъдал везифаяр вахтуналди тамамарзавайди яз, Марат Шамильевич Шихалиев тайинарнава.
Къейд ийин хьи, виликдай М.Шихалиева тарифрин рекьяй кардик квай къуллугъда, “Дагэнергосеть” ОАО-да, “Газпром газораспределение Дагестан” ООО-да директордин заместитель яз кIвалахна.
РД-дин энергетикадин ва тарифрин виликан министр Ризван Мурадова министерстводин телеграм-каналда чапнавай малуматда къейднавайвал, ада министрдин къуллугъдилай элячIдай къарар гьасятда кьабулнач, ам и кардиз виликамаз гьазур хьанвай. “Заз ихтибар ва кIвалахдин рекьяй куьмекар гунай Дагъустандин Кьил Сергей Алимовичаз сагърай лугьуз кIанзава. Идалай кьулухъ яшайишдин гьи хиле кIвалахайтIани, завай республикадиз мадни гзаф хийир гуз жедайдак умуд кутазва…”, — лагьана Р.Мурадова.
Ризван Мурадов министрдин къуллугъдилай элячIун квехъ галаз алакъалу ятIа, малум туш. И кар адалай министрдин везифаяр лайихлудаказ кьилиз акъудиз тахьунихъ галаз алакъалу туш. ГьикI лагьайтIа, 10-январдиз Махачкъалада кьиле фейи совещанидал Сергей Меликова адан кIвалахдилай вичин разивал къалурна. “Энергетикадин хиле кIвалахай вахтунда Ризван Усмановича, ада регьбервал гайи ведомстводи хъсан нетижаяр къазанмишна. Ам министрдин везифайрикай азад авунин къарар республикадин гьукуматдин кIвалахдин менфятлувал мадни хкажунин мураддалди кьабулнава”, — къейдна региондин Кьили.
РикIел хкин, Р.Мурадов министрдин къуллугъдал 2021-йисуз тайинарнай. 10-январдиз РД-дин Гьукуматдин Председателдин Сад лагьай заместитель Манвел Мажонца республикадин энергетикадин ва тарифрин министерстводин коллектив цIийи регьбердихъ галаз танишарна.
“Министерстводин вилик ТЭК-дин хиле государстводин сиясат кьилиз акъудунин, агьалияр газдалди, энергиядалди таъминарзавай къурулушрин менфятлувал артухарунин жигьетдай кар алай месэлаяр акъвазнава. ЦIийи министрдин регьбервилик кваз куьне квел ихтибарнавай везифаяр чешнелудаказ кьилиз акъудун давамардайдак чна умудар кутазва”, — лагьана Манвел Мажонца, министерстводин коллективдихъ элкъвена.
Чи мухбир
