5-январдиз Махачкъалада, М.Гьажиеван тIварунихъ галай куьчеда, машиндик акатна, виликдай Дагъустандин Гьукуматдин Председатель, ДГПУ-дин ректор яз кIвалахай Мегьамед Имранович Абдулаев телеф хьана. Адан 62 йис тир.
РД-дин МВД-дин пресс-къуллугъди хабар гайивал, бедбахтвилин дуьшуьш йифен вахтунда арадал атана. М.Абдулаев рекьелай элячIдайла (къейд ийин хьи, ам кIвачи-кIвачи фидайбур патал тешкилнавай махсус чкадилай элячIзавачир), Къарабудахкент райондин агьалиди гьалзавай машиндик акатна. Хьайи хирерикди ада духтурханадиз физвай рекье чан гана.
Къейд ийин хьи, М.Абдулаеван хизандиз башсагълугъвал гайибурун арада РФ-дин Хатасузвилин Советдин Председателдин заместитель Дмитрий Медведевни ава. Бязи чешмейри хабар гузвайвал, абуру аспирантурада санал кIелна.
М.Абдулаеван ери-бине Гуниб райондин Гамсутль хуьряй я. Юридический илимрин доктор тир, адан къелемдикай международный ва Конституциядин ихтиярриз талукь 50-далай виниз илимдин кIвалахар хкатна.
Агьмед Магьмудов
