РД-дин Кьилин информациядин къуллугъди “Лезги газетдин” редакциядиз хабар гайивал, 10-январдиз Дагъустандин Кьил Сергей  Меликова региондин экономика вилик тухунин оперативный штабдин алукьнавай йисан сад лагьай заседание кьиле тухвана.

Кар алай месэладал къведалди, республикадин регьберди къуллугърал алай бязибур дегишарнавайдан гьакъиндай малумарна. ИкI, РД-дин энергетикадин ва та­рифрин (къиметрин) министр Ризван Мура­дов къуллугъдикай азадна. Адан чка­дал­, министрдин везифаяр тамамарзавайди яз Шихалиев Марат Шамильевич тайинарна.

Региондин Кьили суварин йикъарин нетижаярни кьуна. Гьа гьисабдай яз, ихти­лат оперативный гьалдикай, агьалийрин хатасузвал таъминаруникай, ЖКХ-дин майишатди ва чимивилинни энергетикадин комплексди цIийи йисан каникулрин вахтунда ара датIана кIвалахуникай ихтилат кудна.

Сергей Меликова РД-дин Кьилин ва Гьукуматдин Администрациядин къвалав тешкилнавай, хаталу дуьшуьшар хьайила, тади серенжемар кьабулдай оперативный штабдиз сагърай лагьана. “Санлай къачурла, вири секиндаказ кьиле фе­на. Хьайи хаталу дуьшуьшар суткадин къене арадай акъудна. Штабди гьар са дуьшуьшдиз фикир гана”, — къейдна региондин Кьили.

ЦIийи йисан суварин ял ядай йикъара Дагъустандин муниципалитетра  30-дав агакьна оперативный штабар ва бязи районра дежурство кьиле тухудай жавабдар работникар тайинарнавай. Штабра 1500-дав агакьна къуллугъчийри чпин везифаяр кьиле тухвана.

Идахъ галаз сад хьиз Сергей Меликова Дагъустанда рекьерин гьерекатдин хатасузвал артухарунин лазимвал авай­да­кай малумарна. Мукьвал вахтара и мес­­эладиз талукь яз кьабулзавай серенжемар веревирд авун патал махсус со­веща­ние кьиле тухуда.

Республикадин руководителди къалабулух кутадай делилрикайни рикIел хкана. Январдин ял ядай йикъара транспорт­дихъ галаз алакъалу 40 дуьшуьш арадал­ атана. 67 касдиз хасаратвал, 3 кас те­леф хьана. Автомашинрик ирид дуьшуьшда инсанар акатна, абурукай кьвед кьена.

Докъузпара райондин Авадан хуьр газдикай хкатуниз талукь яз региондин Кьили талукь идарайриз са жерге тапшуругъар гана.

“7-январдиз газдалди таъминарзавай линийра давление агъуз хьуникди хуьруьв газ агакьнач. Талукь къуллугъри та­ди гьалда герек серенжемар кьабулна. Мад сеферда ихьтин дуьшуьшар арадал татун патал гьялна кIанзавай технический месэлаяр ава. Давление агъуз аватун энерготопливо чуьнуьхунихъ галазни алакъалу я. Чна и карни таквазвайдай кьуна виже къведач. Са ни ятIани вичин хсуси жибинар пулуналди ацIурда лугьуз­,  инсанар вучиз къайи кIвалера тазвайди я? Чна, Дагъустандин Кеферпаталай эгечI­на, вири районар ахтармишун лазим я. Законрал амал тийизвай дуьшуьшра, энергоресурсар чуьнуьхзавайла, чун герек серенжемар кьабулуниз мажбур я”.

Дагъустанда и месэладал машгъул жедай махсус десте тешкилда. Региондин экономика дурумлувилелди вилик тухуниз талукь яз Сергей Меликова республикадин къенепатан мумкинвилерикай менфят къачуна кIанзавай­да­кай лагьана. “Санлай къачурла, чна кьабулнавай серенжемри экономика ва бизнес, алай аямдин шартIариз килигна, ви­лик­ тухуниз куьмек гузва”, — лагьана Сергей Меликова.

Дагъустандин Кьили бюджетдин сиясатдин менфятлувили государстводин эко­номикадин хатасузвал таъминарзавайдал фикир желбна. Уьлкведин регьберри вилик эцигнавай везифаяр кьилиз акъудун патал бюджетдай ахъайзавай ви­­ри такьатар тайинарнавайвал иш­лемишна кIанда,  къейдна Сергей Меликова.

“Уьмуьрдиз кечирмишзавай проектар зурбабур я. Чна  чара ийизвай такьатар дуьздаказ ишлемишунал гуьзчивал тухвана кIанда”, — лагьана региондин Кьили.

С.Меликова къейд авурвал, Дагъустандиз масадбурухъ галаз бягьс чIугва­дай, конкурентдин алакьунар авай промышленность ва инфраструктура, жуьреба-жуьре къуллугъар ийизвай вилик фенвай хел, менфятлу хуьруьн майишат герек я.

РД-дин Гьукуматдин Председателдин Сад лагьай заместитель Руслан Алиеван­ гафаралди, виликдай хьиз, карчивал вилик тухуниз кьетIен фикир гуда. ГъвечIи ва юкьван бизнесдиз жуьреба-жуьре куьмекар гуда.

Уьлкведин гьукуматди региондиз хейлин куьмекар гузва. ИкI, алукьнавай йисуз медицинадин работникриз социальный пуларин гьисабдай гьар вацра 4, 5 агъзур манатдилай 18,5 агъзурдав агакьдалди (гьар са касдин кьилиз) пулар гуда. 18,5 агъзур манат — районрин  ва участокрин больницайрин духтуррив, поликлиникайрин, амбулаторийрин духтуррив ва маса работникрив — 14,5 агъзур манат, тади куьмекдин станцийрин духтуррив 11,5 агъзур манат агакьда.

«Лезги газет»