Дагъустанда 2023-йисуз 8 миллиард манатдин къиметдик квай инвестицийрин 5 проект кьилиз акъудда. Идакай, РД-дин карчивилин ва инвестицийрин рекьяй Агентстводин малуматдал асаслу хьана, ТАСС-ди хабар гузва.
Проектрикай сад Кьиблепатан Дагъустанда, СтIал Сулейманан райондин мулкарал, кьилиз акъудда. Чешмедин делилралди, ина роботрин куьмекдалди кIвалахдай, некIедин суьрсет арадал гъидай ва метягьар маса гудай ферма эцигда.
Амай 4 проектдин сергьятра аваз Махачкъалада 12,5 МВт гужлувал авай гарун парк, Дербентда ракъинин электростанция эцигда. Дагъустандин Огни шегьерда стеклотара арадал гъидай цех гегьеншар ва цIийикIа туькIуьр хъийида. Каспийскда шуьшедин чIунар ва абурукай жуьреба-жуьре затIар арадал гъиз гатIунда.
Шаз Дагъларин уьлкведа чпин умуми къиметди 4 миллиард манат тешкилай инвестицийрин 6 проект кьилиз акъудна.
«Лезги газет»
