“Единая Россия” партиядин генсоветдин секретарь Андрей Турчака 2022-йисуз Дагъустанда мектебар цIийикIа туькIуьр хъувунин рекьяй кардик квай программа кьилиз акъуднавай гьалдиз виниз тир къимет ганва. Идакай РД-дин Кьил Сергей Меликова вичин телеграм-каналда кхьенва.
“Дагъустан и программа кьилиз акъудунин жигьетдай 100 процентдин нетижа къазанмишнавай регионрин жергеда гьатнава. Уьлкведа, санлай къачурла, 1274 мектеб цIийикIа туькIуьр хъувунва. Дагъустанда лагьайтIа, абурун кьадар 210-дав агакьна.
Алатай йис Дагъустанда образованидинди яз малумарнавай. Амма образованидин хиле кьиле тухузвай кIвалахар акьалтIарнавач. Абур Дагъларин уьлкведин вири аялриз алай аямдин къулай шартIар авай мектебриз фидай мумкинвилер арадал гъидалди давамарда.
Виридаз чизва, мектебар цIийикIа туькIуьр хъувунин кIвалах регьятди туш: са гьина ятIа пудратчи карханаяр чпин везифайрив намуслувилелди эгечIзавачир, бязи дуьшуьшра чиновникри акьалтIай жавабдарвал къалурнач. И ва са жерге маса себебар хьайивиляй, бязи мектебар виликамаз тайинарнавай вахтунда ишлемишиз вахкуз хьанач.
ЯтIани, чун вилик эцигнавай макьсаддив агакьна. Амма къазанмишнавай агалкьунрал рази хьана акъвазна кIандач, чахъ мадни вилик фидай фикирар ава.
Чна чи регион патал гьакьван герек и программа арадал гъунай РФ-дин Президент Владимир Владимирович Путиназ ва ам кьилиз акъудунин карда куьмекар гунай “Единая Россия” партиядин генеральный советдиз сагърай лугьузва”, — къейдна Сергей Меликова.
Чи мухбир
