29-декабрдиз Махачкъалада 10 ва адалай гзаф аялар чIехи жезвай хизанриз государстводин патай “Газель” маркадин улакьар гуниз талукьарнавай мярекат кьиле фена. Ана РД-дин Гьукуматдин Председателдин заместитель Мурад Къазиева, РД-дин зегьметдин ва яшайишдин рекьяй вилик финин министр Абдурагьман Магьмудова ва масабуру иштиракна.
Мурад Къазиева Дагъустандин Кьил Сергей Меликова республикада яшамиш жезвай гзаф аялар авай хизанриз яшайишдин рекьяй куьмекар авуниз кьетIен фикир гузвайди къейдна ва и кардай адаз сагърай лагьана.
Ада гьакIни хабар гайивал, Дагъустан, гзаф аялар авай хизанрин кьадардал гьалтайла, уьлкведа кIвенкIвечи регионрин арада ава.
Улакьар Хасавюрт, Къизляр, Унцукул, Шамил районрай ва Дербент шегьердай тир 6 хизандиз гана.
Чи мухбир
