2022-йисан декабрдин вацра С.М.Кирован тIварунихъ галай военно-медицинский академиядин офтальмологиядин клиникадин конференц-залда майор Борис Маидовав “Жуьрэтлувиляй” орденни “Женгера къалурай викIегьвилерай” медаль вахкуниз талукьарнавай мярекат кьиле фена. Залан хирер хьанвай офицерди ина вичин сагъламвал мягькемар хъийизва.
Мярекатда Дагъустандин Санкт-Петербург шегьерда авай Векилханадин кьил Гьасан Гьасанова, Ленинграддин военный округдин кьушунрин регьбердин сад лагьай заместитель, генерал-полковник Павел Лабутина, меценат Мирзе Мирзоева, винидихъ тIвар кьур академиядин начальникдин заместитель Владимир Лютова ва масабуру иштиракна.
33 йис хьанвай майор Борис Эфендиевич Маидов Мегьарамдхуьряй я. Ада серенжем гатIунай сифте йикъалай женгера иштиракзавай, мотострелковый батальондиз регьбервал гузвай. Са женгина хирер хьайи ам госпиталдиз аватна. Сагъламвал мягькем хъхьайдалай кьулухъ дирибаш дагъустанви дяведиз хъфена. И сеферда адал мотострелковый ротадин командирдин везифаяр ихтибарна. Вичин хиве тунвай везифаяр намуслувилелди ва хъсан нетижаяр аваз тамамарунай адаз майордин чин гана.
14-октябрдиз кьиле фейи нубатдин женгина Борис Маидовал залан хер хьана. Чуьлдин шартIара арадал гъанвай лагерда медицинадин рекьяй сифтегьан куьмек гана, ам военно-медицинский академиядиз рекье туна. Аллагьдиз шукур, духтуррилай ам къутармишиз алакьна. Исятда Борис Маидовавай масадан куьмек галачиз къекъвез жезва.
Майордин акьалтIай викIегьвилер фикирда кьуна, РФ-дин Президентдин Указдалди адаз “Жуьрэтлувиляй” орден ва РФ-дин оборонадин министрдин приказдалди “Женгера къалурай викIегьвилерай” медаль ганва.
Чи мухбир
