“Лезги газетдин” алатай йисан эхиримжи нумрайрикай сада “Къурушрин сес” газет акъатайдалай инихъ цIувад йис тамам хьуниз талукьарнавай Гьажи Къазиеван макъала чапнай. ЦIинин йисалай и газет мад акъуд хъийизмач. И кардикай “Къурушрин сес” газетдин кьилин редактор, “Лезги газетдин” хсуси мухбир Муса Агьмедова хабар гана. Вучиз ихьтин къарар кьабулнатIа, себебар гьихьтинбур ятIа, ада вичин макъалада лагьанва. Ам чна газет кIелзавайбурузни теклифзава.
…Къурушвийри кьилди хуьруьн газет акъудун им, гьелбетда, хуьруьнвийрин, иллаки литературадиз итиж ийизвай ксарин уьмуьрда фикир желбдай вакъиа хьана. Са йисни зура хуьруьн шаиррикайни мухбиррикай ибарат дестеди чIугур зегьмет себеб яз, хуьруьн газет акъатзава лагьай хабар хейлин чкайриз чкIана, газет неинки дагъдани аранда, гьакI патарал яшамиш жезвай къурушвийрин гъилерани гьатна. Таблигъатдин нетижада подпискадин кьадарни артух жез башламишна. Зи фикирдалди, газет акъудунин кьилин макьсад хуьруьн шаирринни мухбиррин яратмишунар кIелзавайбурун гегьенш къатарив агакьарун, хуьруьнвияр ватанэгьлийриз талукь тир цIийи хабарралди таъминарун, газетдин куьмекдалди абур сад авун тир. Гьевескар мухбирри акъудзавай газетдихъ идалай еке макьсадар жедани кьван? Пешекар журналистар ва маса такьатар авачир са гъвечIи газетдивай, тамам СМИ-дивай хьиз, жемиятда кьиле физвай вири гьерекатра иштиракиз хьун (мисал яз, критикадин макъалаяр кхьиз) регьят крарикай туш эхир. Бубайрин мисалда лугьудайвал, яргъан тирвал кIвач яргъи авун лазим я, амма яргъан тирвал (яни мумкинвал аваз-аваз) кIвач яргъи тавур дуьшуьшарни чахъ хьайиди, за, кьилин редакторди хьиз, хивени кьазва.
Гила и макъала кхьинин кьилин себебдал элячIин. Чун “Къурушрин сес” газетдин кIвалах 2022-йисан 29-декабрдиз акъатнавай нумрадалди акьалтIардай къарардал вучиз атанатIа малумариз кIанзава. Яргъалди фикир-фагьум авурдалай, юкIвар-чипIер ягъайдалай кьулухъ чун ихьтин фикирдал гъайи са шумуд себеб ава.
Сад лагьайди, сифте газет акъуддай чIавуз коллективда зегьмет чIугур ксар йисалай-суз чи арадай акъатуни газетдин кIвалахдиз таъсир тавуна тунач. Са бязи авторри, хсуси себебар аваз, сифтедай хьиз кхьин хъийизмач.
КIелзавайбуруз аквазвайвал, эхиримжи йисара газетда хсуси макъалаяр гзафни-гзаф Гьажи Къазиеван тIвар алаз акъатзавай. ДатIана макъалаяр кхьиз хьайи Мегьамед Ибрагьимов “Лезги газетдин” кьилин редакторвиле акъвазайдалай кьулухъ адахъни чи газетда гьамиша хьиз зегьмет чIугвадай вахт (мумкинвал) амукьнач. Вири и делилри газетдиз гудай материалар кьит хьунал гъана. Кьилди махсус мажибар гана, журналистар желбдай такьатар чахъ авач.
Кьвед лагьайди, интернет (телефонар, компьютерар…) халкьдин яцIа гьатайдалай кьулухъ печатдин изданияр хабарар чукIурдай такьат хьиз гуьгъуьна амукьнава. Къе интернетда кIелай са хабар са шумуд йикъалай, гьафтедилай кIвализ газетди хкизва. Ихьтин шартIара кIанзни-такIанз газетди инсандин уьмуьрда хабарар гъидай такьатди хьиз гьамишан чка кьазмач.
Пуд лагьайди, къейд авун лазим я, чна газет подпискадилай хьайи ва куьмекдин гъил яргъи авур ксари гайи пулунин такьатрихъ акъудзавайди тир. И кардихъ галаз алакъалу яз, газетдин тираж артух хьуни ам чапдай мумкинвални артухарзавай. Амма дидед чIалал акъатзавай изданияр кIелзавайбур иллаки яшлу несилар я. Ахьтин подписчикар арадай акъатуникди газет кхьизвайбурун кьадарни тIимил жезвай, акьалтзавай несилри лагьайтIа (са тIимилбур квачиз), дидед чIалал акъатзавай изданияр кIел тийизвайди садазни сир туш. Абуру чпиз итижлу хабарар интернетдай кIелзава, видео, аудио материалрикай менфят къачузва. Спонсоррикай рахайтIа, цIувад йисан къене чаз куьмекар гайи ксар гзаф хьана. Сагърай чеб вири! И кар чна газетдин эхиримжи нумрайрикай сана къейдни авунай. Амма гьар йисуз, “газет акъуддай пул це ман” лугьуз, инсанар инжиклу авунни рикIиз хуш кар туш.
Вири и крар фикирда кьурла, винидихъ къалурнавай ва гьакIни четинвал ацалтзавай маса себебар авайвиляй чун “Къурушрин сес” газетдин кIвалах акъвазар хъийидай фикирдал атана. Чна хуьруьн газет тешкилиз куьмек гайи вирибуруз (спонсорриз, мухбирриз, кIвалах тешкилайбуруз, подписчикриз, кIелайбуруз) сагърай лугьузва!
2023-йис патал газет подписка авур ксарив чна пулар ахгакьарда. Гьа са вахтунда ахгакь тавур касди къуй чаз и кардикай хабар гурай.
Кьве гаф гила заз газетда тухвай жуван кIвалахдикай лугьуз кIанзава. “Къурушрин сес” газетдиз за саки 14 йисуз регьбервал гана. Эгер и газетдай за (чиз-чиз ва чин тийиз) хатур хайи, бейкеф, инжиклу авур инсанар аватIа, залай гъил къачун тIалабзава. Жувак гъалатIар хьайиди за хивени кьазва.
Кьилди заз вири и йисара “Къурушрин сес” газетдин кьилин редактордин заместитель яз кIвалахай Гьажи Къазиеваз сагърай лугьуз кIанзава. “Къурушрин сес” газетдин сад лагьай кьилин редактор, зи буба Ариф Агьмедов кечмиш хьуникди зи хиве газетдин кIвалах гьатай йикъалай инихъ Гьажи Къазиева къуьн-къуьневаз захъ галаз кIвалахна, садрани зун текдиз тунач. Адан зегьметдикай зун рахун тавуртIани, газетрин чинри шагьидвалзава.
Гьуьрметлу къурушвияр, къуй куь гьар садан кIвале хушбахтвал, рикIера шадвал, чандин сагъвал хьурай! Куьн гьам и дуьньяда, гьамни Эхиратда бахтлу инсанрин жергейра хьурай!
