Неинки са Докъузпара райондин, гьакI Европадани виридалайни кьакьанда авай Къурушрин хуьре алай вахтунда цIаяр кьуникай хуьдай ва къутармишдай (пожарно-спасательный) часть эцигунин кIвалахар йигин еришралди кьиле физва. КIвалахдив эгечIнавай 4 вацран вахтунда 110 метрдин яргъивал алай цал чIугунва, машинар акъвазардай гаражар, рабочийрин кIвалер эцигнава. Мукьвара къавар туькIуьрунин кIвалахрив эгечIун пландик ква.
Гьавадин мекьивилизни килиг тавуна, кьиле Бейбутов Намик аваз, эцигунардайбурун бригадади гьакъисагъвилелди зегьмет чIугвазва. Вичин кIвалахдал рикI алай экскаваторщик Агъарзаев Агъаризадин, КамАЗ-миксер гвай Омаров Рамазанан, цлар эцигдай устIар Расулов Мурадинан тIварар кьаз жеда. Рабочийри — А.Агьмедова, М.Женетова, Р.Султанова, З.Женетова, В.Шекиева гьакъисагъвилелди зегьмет чIугвазва. Эцигунар патал материалралди таъминарунин карда камазистар тир Агъамурадов Султанмурада, Къафланов Атлуди, Келбиханов Мегьамедкерима гьар са рейс вахтунда агакьарзава. Объектдин пару чIугунин кIвалахар Къурушдилай тир устIарри — Азаев Азая, Салманов Сулеймана, фялейри — Багъиров Намика, Гьажиев Кагьримана, Эскеров Абила гьакъисагъвилелди кьилиз акъудзава. КIвалахрал прораб Шерифа, Гьажиев Сарухана, Мухтаров Расула гуьзчивал тухузва. ЦIаяр кьуникай хуьдай часть ишлемишиз вахкун 2023-йисан юкьваралди акьалтIарун пландик ква.
Докъузпара райондин кьил Мегьамед Шамилован гафаралди, сифтедай Къурушдал цIаяр кьуникай хуьдай часть эцигун пландик квай. Амма туризм ва альпинизм вилик фин, хуьруьз туристар ахмиш хьун фикирда кьуналди, планар дегишарна (вертолетдин майданни галаз пожарно-спасательный подразделение арадал гъунин къарар кьабулна).
Райондин центрадивай 26 км-дин яргъа авай Къурушрин хуьр патал цIаяр кьуникай хуьдай ва къутармишдай часть эцигун лап важиблу я, гьикI хьи, дагъдин рекьяй аниз хкаж хьун патал са сятинилайни артух вахт лазим къвезва. М.Шамилован суьгьбетдай мадни малум хьайивал, и частуна 22 касди кIвалахда, абурни чкадин агьалийрикай хкяда.
С-А.Сулейманов
