Махсус серенжем

РФ-дин оборонадин министерстводи 26-декабрдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 352 самолет ва 192 вертолет, зенитный ракетайрин 399 комплекс, пилот галачиз лув гудай 2731 аппарат, 7249 танк ва дяведин маса машинар, РСЗО-дин 944 машин, артиллериядин ва маса 3719 яракь, военный махсус 7765 автомашин тергна.

Сир яз амач

США-диз ва НАТО-дик квай адан амадагриз Россиядин винел­ “женгерин майданда” гъалибвал къазанмишиз кIанзава. Ихьтин фикир РФ-дин къецепатан крарин министр С.Лаврова лагьана. Адан гафар “ТАСС” чешмеди раижна.

“Исятда садазни сир яз амач, США-дин ва НАТО-дик квай адан амадагрин стратегиядин макьсад женгерин майданда Рос­сия­дин винел гъалибвал къачун ва чи уьлкве зайифарун, гьатта тергун я. И макьсаддив агакьун патал абур гзаф крар кьилиз акъу­диз гьазур я”, — лагьана министрди.

Ада алава хъувурвал, Украинадин къизгъин къалмакъалрин кьилин терефдар США яз амукьзава. Тестикьарайвал, Америкадин тереф къалмакъалдикай экономикадин ва военный рекьяй еке менфятар къачуз алахъзава. Кьилди къачуртIа, министрдин фи­кирдалди, Вашингтондиз “Европадин сателлитар вичиз муь­тIуьгъариз” кIанзава.

Хкудиз кIан хьана

Украинадин МИД-дин кьил Д.Кулебади малумарнавайвал, уьлкведиз Россия ООН-дин Совбездикай хкудунин месэла къа­ра­гъардай ниятар ава.

“Новости” РИА-ди хабар гузвайвал, Украинадин радади  “уьлкведин цав кIевуниз” ва Россия ООН-дин Совбездикай хкудуниз, вири россиявияр патал санкцияр мадни мягькемаруниз эвер гана.

“Чаз дуьньядивай кар кьетIдай гьерекатар герекзава. Гьавиляй чна ЕС-дивай, НАТО-дивай Украинадин цав гьа и къе кIевуниз эвер гузва”, — истемишна ада.

Гужлу яракь

Китайдин “Sohu” порталда Россиядин зенитдинни ракетайрин С-500 комплекс къенин юкъуз дуьньяда виридалайни гужлуди я лагьа­на кхьенва.

С-400 яракьдилай гуь­гъуьниз Россия гьасятда      С-500 арадал гъунив эгечI­на. Макъаладин авторди С-500 ЗРК Россиядин гележегдин ВКО-дин (воздушно-космическая оборона) цIийи “къалхан” тирди тес­тикьарна. Алава хъувунвайвал, им Вашингтондин космический стратегиядиз зурба жаваб я.

Бине авачир къурхуяр

Ирандин МИД-дин векил Н.Канааниди уьлкведи Украинадин къалмакъалда иштирак тийизвайдакай ва чпиз гузвай къурхуяр жавабдарсузбур тирдакай лагьана. Идакай “Новости” РИА-ди хабар гузва.

В.Зеленскийдин офисдин меслятчи М.Подоляка алатай гьафтеда Ирандихъ галаз алакъалу месэладай “кIвалах тийизвай санкцийривай” къерех хьун ва производство тергун, поставщикар дустагъ авун герек тирди лагьана. Ихтилат Россиядив гуя дронар агакьарзава лугьуникай я.

Ирандин терефди са шумудра тестикьарна хьи, къалмакъал­да авай гьич са терефдизни дронар ракъурзавач. “Ибуру, муькуь­буру Ирандик тахсирар кутуникди Украинадиз, анин халкьдиз ва вилик-кьилик квайбуруз куьмек жедач. Чна абуру кутазвай тахсирар бине авачирбур яз гьисабзава”, — къейдна Н.Канааниди.

Кьве сеферда гзафарда

Россияда 2025-йисалди автомобилар акъудун кьве сеферда артухардайвал я. “Новости” РИА-ди хабар гузвайвал, идакай РФ-дин вице-премьер, промышленностдинни алишверишдин министр Д.Мантурова малумарна.

Ихтилат чи уьлкведа туькIуьрзавай автомобилрин вири жуьрейрикай физва.

КичIе хьана

РагъакIидай пата газдин къиметдин вини кьадар тайинарайдалай кьулухъ Россияди жаваб яз кьабулзавай серенжемар себеб яз, дуьньядин базарра туьнт гьалар арадал къвезва. Идакай “Новости” РИА-ди хабар гана.

Франциядин “Les Echos” газетда кхьенвайвал, Россия хкудзавай нафтIадин кьадар тIимилариз гьазур хьуни къалабулух кутазва. Гьатта са жизви кьванни нафт арадал гъун тIимиларайтIа, гьакIни пайгардик квачир базардин гьалар мадни зайиф жеда.

Къейдзавайвал, эхиримжи гьафтеда нафтIадин къимет, йисан делилриз килигайла, агъуз аватна, амма эхиримжи йикъара садлагьана хкажни хъхьана. НафтIадин кьадар тIимил жез ки­чIез­вайвиляй къимет багьа хьанва.

«Лезги газет»