ЦIийи йисан вилик Дербентдин администрациядин образованидин управлениди шегьердин мектебра кIелзавай етим аялриз “Дубай” ресторанда мергьяматлувилин мярекат тешкилнавай. Ана Дербент шегьердин кьил Рустамбег Пирмегьамедова, собранидин депутатар тир Нариман Мусаева, Ровшан Омарова, кIвачин къапарин “IERDI” компаниядин директор Жамидин Гьасанова ва масабуру иштиракна.
“Къенин мярекатдик кьил кутунвай кIвалахдин рекьяй зи юлдашриз, депутатриз, образованидин управленидин векилриз, мектебрин директорриз, волонтерриз сагърай лугьуз кIанзава. Алукьзавай ЦIийи йисуз за квез мурадрив агакьун алхишзава”, — лагьана Р.Пирмегьамедова, мярекатдал рахадайла.
Кьилел диде-буба аламачир аялриз сувар тебрик авурбурун арада гьакIни шегьердин депутатрин собранидин председатель Гьасан Мирзоев, образованидин управленидин начальник Чимназ Алиева ва масабур авай.
Тебрикрихъ галаз санал мярекатдиз эвернавай вири аялриз суварин савкьатар (чими парталар, кIвачин къапар ва ширинлухар) гана.
Эхирдай шегьердин яратмишунрин мектебра чирвилер къачузвай аялри вижевай концертни гана.
Къагьриман Ибрагьимов
