Мегьарамдхуьруьн райондин Уружба хуьре, юкьван школадин актовый залда, Дагъустандин халкьдин писатель, шаир ва драматург Абдуселим Исмаилован 75 йисан юбилейдиз талукьарнавай шадвилин межлис кьиле фена. Ам Дагъустандин писателрин Союздин секретарь, лезги секциядин кьил Владик Батманова устадвилелди тухвана.

Ингье тайинарнавай вахтунда вири мугьманар залда кIватI хьана, мярекатдив гатIунна. Гаф райондин кьил Фарид Агьмедоваз гана.

— Алай аямдин Дагъустандин литературадин бажарагълу векилрикай сад тир шаир, прозаик, драматург, публи­цист­ ва таржумачи Абдуселим Абумислимович Исмаилован 75 йисан юби­лейдин шадвилин межлис РФ-дин Пре­зи­дент Владимир Путинан Указдалди  тайи­нарнавай “Россиядин халкьарин эде­би­ятдин ирсинин йисан” сергьятра аваз тухузвайди я, — лагьана райондин регьберди. —  Чи ватанэгьлидин яратмишунрин кIва­­лах кьериз-цIаруз жедай хьтин жуьредин гзаф терефринди я.

Райондин регьберди шаирдиз адан юбилей мубаракна. Адахъ мягькем сагъвал, яргъи уьмуьр, яратмишунра мадни чIехи агалкьунар хьана кIанзавайди лагьана. Райондин эдебият, искусство вилик тухуник вичин чIехи пай кутунай, гзаф йисара бегьерлу зегьмет чIугунай Абдуселим Исмаиловаз “Почетный гражданин Магарамкентского района” гьуьрметдин тIвар ганвайди малумарна, райондин патай савкьат вугана.

Шадвилин межлисдал рахай “Лезги газетдин” хсуси мухбир, публицист Аб­ду­лафис Исмаилова — газетдин кьилин редактор Мегьамед Ибрагьимован ва редакциядин яратмишзавай коллективдин, кIелзавайбурун тIвару­нихъай, Да­гъустандин халкьдин шаир Майрудин Бабаханова СтIал Сулейманан рай­ондин регьбер Саид Темирханован ва вири жемятдин тIварунихъай Абдуселим Абу­мислимовичаз 75 йисан юбилей рикIин сидкьидай мубаракна.

Райондин общественный палатадин регьбер Агъадаш Нагъметуллаева, Уружбайрин юкьван школадин директор Рабия Къагьримановади, Ярагъ-Къазмайрин школадин лезги чIаланни литературадин муаллим Магьият Жарулаевади, райондин общественный палатадин член Тажидин Агьмедова юбилярдиз мубаракар авунихъ галаз сад хьиз адаз хуш келимаяр лагьана. Шаир Гъулангерек Ибрагьимовади Абдуселим Исмаиловаз бахшнавай вичин шиир кIелна.

Межлисдал Лезги театрдин артистри А.Исмаилован “Пуд югъ” пьесадай эцигнавай тамашадай са чIук къалурна, школьникри адан эсерар кIелна. Мярекатдин программа Украинада кьиле тухузвай махсус серенжемда игитвилер къалурзавай женгчийриз Абдуселим ­Исмаилова бахшнавай шиирдин бинедаллаз бажарагълу композитор Къагьриман Ибрагьимова туькIуьрнавай ма­ни-клипди мадни девлетлу авуна. Мани композиторди вичи тамамарзавай.

Межлисдин эхирдай Абдуселим Абумислимовича и шад мярекат тешкилайбуруз сагърай лагьана.

Чи мухбир