Наркотикар жагъана

Дагъустандин МВД-дин УКОН-дин (управление по контролю за оборотом наркотиков) къуллугъчийри мефедрон кутунвай 9 багълама гвай итим кьуна. Идакай РД-дин МВД-дин пресс-къуллугъди хабар гузва.

Махачкъаладин мукьув гвай чкада яшамиш жезвай, 47 йисан яшда авай агьали органрин къуллугъчийри ахтармишна. Адавай жагъай мефедрон, санлай къачурла,  110 дозадикай ибарат тир.

Тади гьалара серенжемар кьабулай вахтунда полициядин къуллугъчийрив агакьай малуматрал асаслу яз, кьунвай кас мессенджердин куьмекдалди наркотикар маса гунал-къачунал машгъул тир. Ада маса региондай санал гзаф мефедрон маса къачуна, ам кьилдин гъвечIи пакетра туна. Гуьгъуьнлай абур Махачкъалада, анин патарив гвай чкайра, гьакIни республикадилай къецени раиж авуна. И гьакъикъат шак фенвайда хсуси телефондай масабурухъ галаз авунвай рахунри-кхьинри тестикьарзава.

Тахсиркарвилин лишанриз килигна, РФ-дин УК-дин 228-статьядин 2-паюнай (къанунсуздаказ наркотикар маса къачун, хуьн ва санай масаниз тухун) уголовный дело къарагъарнава. Силисдин кIвалах давам жезва.

«Лезги газет»