* * *

Инсандин, лезги инсандин, ахлакь арадал атунин гьерекатда Етим Эминан таъсир гзаф я. Етим Эмин галачиз адан руьгьдин хазина кесиб я. Етим Эминаз эвез авач.

* * *

Етим Эминакай магьрум хьайи милли эдебият ракъиникай магьрум хьайи цав хьиз я.

Ибрагьим Гьуьсейнов

Етим Эминаз

Аялзамаз етим хьайи,

Арифдар яз къази хьайи,

Вири элдиз сейли хьайи,

Шаир хьана Етим Эмин.

 

Муьгьуьббатдин сирерикай,

Дуьньяд гьижран — дердерикай.

Азадвилин рекьерикай

Кхьей кас я Етим Эмин.

 

Гьар са касдин писни хъсан,

Акунмаз вич жедай гьейран.

Шандакьардай тумакь яцран

Душман хьана Етим Эмин.

 

Дуьнья акур гуьзгуьдай  хьиз,

Халкьдив рахай, пайгъамбар хьиз,

Кьелни шекер девирдин тIуьр

Инсан хьана Етим Эмин.

 

Дили — диванадин чирагъ,

Лезгистандиз экъечIай рагъ,

Шииррикай эцигай дагъ

УстIар хьана Етим Эмин.

 

Девир тирла вич гургьагур,

Лезги чIалан бине кутур.

КIанибурун рикIера нур

Тур кас хьана Етим  Эмин.

Рамазан Велибегов

Кьенвач Эмин

Кьенвач Эмин, амазма чи арада,

Экуь чирагъ хьиз вилик ква, рехъ къалуз,

Гагь муьгьуьббатдив ацIана,

Гагь гьахъсузвал русвагьзава, куз-хъухъуз.

 

Кьенвач Эмин, вишни кьудкъад йис хьана,

Чан алама адан гьар са гафунал,

Лезги халкьдин лап багьа тир ирс хьана,

Жавагьирар кхьей рикIин къастунал.

 

Кьенвач Эмин, муьгьуьббатдин цIелхем хьиз,

РикIин къеняй хур пад ийиз акъатай.

Дустаривни рахазма ам керчекдиз,

Стхадивни, вич туна къакъатай.

 

Кьенвач Эмин,  чи рушарин къаматар

Ханумрихъни, гьуьруьйрихъни гекъигиз,

Уьмуьрлухди куьтягь тежер савкьатар

Тунва ада вичин патай несилриз.

 

Рекьидач ам чил амай кьван вич хайи,

Лезги хуьрер, лезги эдеб амай кьван.

Рекьидач ам халкь амай кьван вич кIани,

Лезги халкьдин шииратдин къагьриман!

ФатIимат  Османова,

Сулейман-Стальский район, Эминхуьр

Кузвай рикI

Ваз лугьузва эдебиятдин буба,

Лезги чIалан уламар чирай зурба.

Вучиз вун тир халкьдиз мирвет гвай къази?

Чумахъ, чанта гвайбур тир валай рази.

 

Куьз лагьанай дили-диванадин чирагъ?

Кесиб халкьдиз вун тир хьи чим гузвай рагъ!

Вучиз ажайиб тIвар гана ваз “Етим”?

Куьз лагьайтIа хьанач валай кай(и) итим.

 

Ажеб хуш я чи  шаирриз ви чешне!

Туькезбанни я муьгьуьббатдин чешме!

Алакьайди сагъар ийиз чи гуьгьуьл,

Вун тир кьакьан чирвилерин дерья-гьуьл.

 

Куьз чна ваз лугьузва адил устIар?

“Чанах, чанта санал вегьин я къастар”.

РикIера хуьн пак садвални муьгьуьббат,

Дуьньяди и цуьк акъудда хьи, гьелбет!

 

Асирралди амукьда вун, эй инсан.

Куьз лагьайтIа амалар  я ви масан.

Етим Эмин, хкахьдач ви кузвай рикI,

Лезги халкьдиз я хьи вун гьа Шалбуз тик!

Сулейман Пашаев