Дагъустан Республикадин военный камиссардин къарардал асаслу яз, Дагъустан Республикадин образованидинни илимдин министерстводихъ галаз саналди меслят хьана,  «Школьникрихъ галаз армияда къуллугъ авун патал виже къведай чирвилер» темадай  республикадин сергьятра кьиле тухун патал мярекат тешкилнавай.

И кар фикирда кьуна, Докъузпара райондин образованидин управленидин къуллугъчи Осман Османован регьбервилик кваз райондин мектебрин 10-классра кIелзавай аялриз Россиядин армияда къуллугъ авун патал виже къведай гьазурвилериз талукь вад йикъан (5-9-июндиз) къене чирвилер гунин мярекат Мегьарамдхуьруьн  районда «Гарагъ» тIвар алай  сергьятар хуьзвай заставада кьиле фена.

И мярекатда армиядин жергейриз фидай вахт тахьанвай 37 жегьилди ва ОБЖ, НВП предметар тухузвай  8 муалимди иштиракна.

Заставадиз фидалди вилик Усугъчайдин СОШ-да ОБЖ ва НВП предметрин муаллим Сарухан Саруханова  М.Калашникован автоматдин теориядиз талукь тарсарни тухванва. Заставада аялар военныйрин яшайишдин шартIарихъ, сергьятчийри къуллугъзавай жуьредихъ ва лишанар ядай яракьдихъ галаз танишарна. Иштиракчийрихъ галаз «военный тактикадин гьазурвал», «цIай гудайла гьазурвал», «вириаскервилин устав», «жергедин гьазурвал», «сагъламвилин гьазурвал», «медецинадин рекьяй гьазурвал» ва «военный къуллугъдин хатасузвилин бине» темайрай тарсарни тухвана.

Эхирдай сергьятар хуьзвай заставадин кьиле авайбуруз ихьтин чирвал гудай тарсар тешкилунай ва кьиле тухунай чухсагъул лагьана. И жуьредин мярекатдикай чIехи жезвай несилдиз еке хийир ва метлеб авайдакай къейдна.

«Лезги газет»