Такабурлу кьакьан дагъларай кьил къачуна, авахьзавай вацIуз акъвазун хас туш: ада, са куьнизни килиг тавуна, вичин ериш тирвал агъадалди еримишда. Инсандикайни гьа икI лугьуз жеда: адани, я вахтуниз, я хъутIалризни килиг тавуна, уьмуьрдин рехъ датIана давамарда.
Ингье вичиз гьахълудаказ муаллимрин хуьр лугьузвай Курхуьрел дидедиз хьайи, республикадин, уьлкведин тIвар дуьньядин майданда машгьур авур алимарни шаирар акъатай Алкьвадрин хуьруьн юкьван школада физкультурадин муаллимвиле кIвалахзавай Агъамирзе Агъамирзоев уьмуьрда 60 йисан рекьиз фенва. И рехъ гьихьтинди хьана?
А.Агъамирзоев 1962-йисан 16-ноябдиз Курхуьрел чпи яргъал йисара производствода гьакъисагъвилелди зегьмет чIугур Шайда Мирзебалаевичанни Нурат Идрисовнадин чIехи ва гьуьрметлу хизанда дидедиз хьана.
Муьжуьд аял хьайи и хизанда кьве аял гъвечIизамаз рагьметдиз фена. Муькуь 6 велед диде-бубади халис зегьметкешар, гъвечIиди-чIехиди чидай инсанар яз уьмуьрдин шегьредал акъудна.
Курхуьруьн 1-нумрадин юкьван школада 8-класс акьалтIарай Агъамирзе 1977-йисуз Хасавюртдин З.Батырмурзаеван тIварунихъ галай педучилищедин физкультурадин отделенидик экечIна. Им дуьшуьшдин кар тушир, гьикI лагьайтIа, зиринг гадади школада кIелдай йисара районда кьезил атлетикадай, волейболдай, путар хкажунай тухузвай спортдин акъажунра кIвенкIвечи чкаяр кьунай.
Спортдал машгъул хьун, турнирра иштиракун А. Агъамирзоева педучилищеда кIелдай йисарани давамарна.
1980-йисуз педучилище акьалтIарай жегьил пешекарди вичин зегьметдин рехъ Аламишедин (Эминхуьруьн) юкьван школада физкультурадин муаллимвиле кIвалахунилай башламишна.
1981-йисан майдилай 1983-йисан майдалди А.Агъамирзоева КIварчагърин хуьре ачухай школьникрин ял ягъунинни производстводин лагерда тербиячи, гуьгъуьнлай 3 йисуз Сардархуьруьн юкьван школада физкультурадин муаллим яз кIвалахна.
1986-йисалай инихъ Агъамирзе Шайдаевича Алкьвадрин юкьван школада вичин рикI алай пешедай кIвалахзава.
— Чи школадиз кIвалахал атай сифте йикъарилай Агъамирзе Шайдаевича вич физкультурадин рекьяй хъсан чирвилер, алакьунар авай муаллим, тешкилатчи, насигьатчи яз къалурна, — лугьузва школадин директор Гьамид Рашидович Гьамидова. — Адан кIвалахдин нетижа яз, школадин командайри ва кьилдин жаван спортсменри районда ва адалай къеце тухузвай турнирра кIвенкIвечи чкаяр кьазва.
А.Агъамирзоевахъ галаз авур суьгьбетдай малум хьайивал, алай вахтунда школада волейболдай, столдин теннисдай ва футболдай секцийри кIвалахзава.
Агъамирзе Шайдаевича школада спортдин рекьяй вердишвилер гайи гадайрикай тIвар-ван авай спортсменар хьанва. Абурукай яз завай грэпплингдай Россиядин чемпион, жегьилрин арада ММА-дай Россиядин Кубокдин призер Имам Юсуфован, жегьилрин арада, далу кIаникна, штанга хкажунай Европадин ва дуьньядин чемпионатрин призер Бугьадин Рамазанован, джиу-джитсудай Дагъустандин чемпион Камил Абдурагьманован ва масабурун тIварар кьаз жеда.
А.Агъамирзоева чаз школадихъ галай ва хъсандиз туькIуьрнавай мини-футболдин майдан, гегьенш спортзал къалурна. Муаллим инанмиш я хьи, школадай гележегда машгьур спортсменар мадни акъатда. Ина умуд кутаз жедай гадаярни ава, рушарни.
1993-йисуз Агъамирзе Шайдаевича Дагъустандин госпединститутдин физкультурадин факультетни (заочнидаказ) акьалтIарна.
Яргъал йисарин намуслу ва бегьерлу зегьметдай А.Агъамирзоеваз “РФ-дин образованидин гьуьрметлу работник”, “Дагъустан Республикадин образованидин отличник” лагьай гьуьрметдин тIварар ганва.
— Агъамирзе Шайдаевич районда физкультурадин тарсар гузвай лап хъсан муаллимрин жергеда ава, — лагьана чаз райондин образованидин управленидин начальник Гьуьсейн Шихбабаева. — Муаллимди вичин девлетлу тежриба жегьилриз гузва. Агъамирзе муаллимди районда кьезил атлетикадай тухузвай акъажунра судьявални ийизва. Агъамирзе Шайдаевич вичи хкянавай пешедин устад я. Адан кIвалахдилай чун гзаф рази я. Чна адал дамахзава.
Чаз малум хьайивал, А.Агъамирзоев, чешнелу муаллим, хъсан насигьатчи, общественник хьиз, хуьре-кIвале гьуьрмет авай туькIвей хизандин кьилни я. Ада вичин уьмуьрдин юлдаш Фариза Тажибовнадихъ галаз санал ферли 3 велед — 2 рушни 1 гада — тербияламишна. ЧIехи руш Сабинади Сийидрин хуьруьн фельдшервилинни акушервилин пунктунин заведующий яз, Индиради Кьасумхуьрел аптекада, гада Шайдади Санкт-Петербургда кIвалахзава.
Агъамирзе Шайдаевичан 60 йис тамам хьайи юкъуз школадин муаллимрин коллективди чаяр хъвадай са гъвечIи межлисни къурмишнавай. Анални юбилярдиз кIвалахдин юлдашри хуш келимаяр лагьана.
Школадин директор Гь.Гьамидова мярекатдал Агъамирзе Шайдаевичав райондин образованидин управленидин, образованидин работникрин профсоюздин комитетдин ва школадин дирекциядин гьуьрметдин грамотаяр, гьакIни школадин муаллимрин коллективдин патай пишкешарни вахкана.
“Ашкъидалди кIвалахал физвай ва шадвилелди кIвализ хквезвай инсан бахтлу кас я”, — лагьанай туьркерин шаир Назим Хикмета. Зи фикирдалди, тамам 42 йисуз ашкъидалди кIвалахал физ-хквезвай Агъамирзе Шайдаевични бахтлу кас я.
60 йисан юбилей мубарак авуналди, чаз лугьуз кIанзава: ви бахтлувилин рехъ яргъиди ва бегьерлуди хьурай, гьуьрметлу Агъамирзе Шайдаевич!
Хазран Кьасумов
