(Рецептар)

Россиядин минздравдин делилралди, чи уьлкведин азарханайрин урологиядин отделенийра къатканвай эркекрин (гьам жегьилрин, гьамни яш хьанвайбурун) 60 процент простатит ва аденома азаррикди тIаз­вайбур я.  И азарар гьикI арадиз къвезватIа, чна кхьенай. Сагъар хъийиз алахъдалди абурун  вилик пад кьун хъсан я.

Гьаниз килигна, чна квез са кьадар рецептар кхьизва. Дарманрин хъчарикай гьазурзавай ихьтин рецептар гзаф ава, амма чна квез малум тир, куь гъилик квай такьатрикай кхьида.

1. Са гъапавай чичIекрин хъуьруьшар чуьхвена, 3 истикан ргазвай яд илична, шир алай къапуна 5 декьи­кьада яваш цIал ргада, са сятдилай куьзда. Йикъа 3 сеферда, хуьрек недалди са зур сятдин вилик  истикандин кьатIавайди 30 юкъуз хъвана кIанда. Идалай кьулухъ 10 юкъуз ял яна,  мад хъвайитIани жеда.
2. Тамун шуьмягъар (лешина) гзафбуруз малум я. Хуьрекдин са тIуруна авай куьлуь авунвай чIуру шуь­мягърин пешерал (хьайитIа, кьурурнавайбур хъсан я) са истикан ргазвай яд илична, 5 декьикьада, цIай лап ява­шарна, ругун хъувуна, куьзна, йикъан къене­ цин ва чай­дин чкадал хъвана кIанда (вири санлай, са сеферда­ — ваъ).

Шуьмягърин пешерикай къаришма гьазурдай  жуьреяр мад ава:

—  хуьрекдин 2 тIурунавай куьлуь авунвай пешерал­  0,5 литр ргазвай яд  илична, 10 декьикьада явашдиз  ругун хъувуна, куьзна,  йикъан къене цин чкадал хъвана кIанда.

3. ЧIуру шуьмягърин 1 килограмм хъиреяр куьлуь­ авуна, 2 л яд илична, цин са пай амукьдалди (1л) яваш цIал ргада, ахпа гьакьван вирт яна, акадарна, тада. Йикъа 3 сеферда хуьрек недалди вилик 30 мл (хуьрекдин са тIурунавайди) ишлемишна кIанда.
4. Къавахдин (осина обыкновенная) тIурарни, пешерни, чкални менфятлу я. ТIурар, тарци цуьк ийидайла, кIватIна, пекинал ва я чарчел экIяна, гьавадал серин­дик кьурурда. Пешер гатун сифте кьиляй кIватIна, кье­лечIдиз экIяна, сериндик кьурурда. Чкал таза хилерилай майдин ва июндин варцара кIватIна кьурурда.

— Чайдин 2 тIурунавай  куьлуь авунвай тIурарал 2 ис­тикан кудай яд илична, 15 декьикьада туна, куьзна, йи­къан къене 3-4 сеферда хъвана кIанда.

— Чкал (45 гр)  куьлуь авуна, зур литр (0,5 л) кудай яд илична,  са пай амукьдалди яваш цIал ргада. Вирт акадариз, йикъа 3 сеферда хуьрек недалди вилик        50 мл  хъвана кIанда.

— 5 тIурунавай куьлуь авунвай чкалрал (хуьрекдин тIурунавай) 0,5 л эрекь илична,  2 гьафтеда тада, куьзда, йикъа 3 сеферда хуьрек недалди вилик са  тIурунавайди хъвада.  Эрекьдин жевгьер, операция ийиз тежедайла, ишлемишиз лап хъсан я.

5. Бурандин цилерини простатит, аденома авайбуруз хъсандиз куьмекда. Абур гьакI тIуьртIани ва я хвех регъвена, барабардиз виртIедик акадарна, тIуьртIани жеда. Салан майвайрикай тек са буран я вичикай гьич са зиянни авачирди. Ам, гьи жуьреда тIуьртIани, менфятлу я.
6. Лап хъсандиз куьмекда вергерин дувулрини. Хъсандиз чуьхвенвай таза дувулар (зулуз ва я гатфа­рин сифте кьиляй хкуднавайбур), як регъведай ма­шин­кадай акъудна, банкада твада, 45 градусдин эрекь 1-2 сан­тиметрдин винел акьалтдалди илична, 2 гьафтеда (гьар юкъуз юзуриз) тада, ахпа куьзда. 1-2 чайдин­ тIуру­навайди хуьрек недалди вилик йикъа 3 сеферда хъвада­.
7. ЧIижер акьван хийирлу я хьи, абуру, чеб кьейила­ни, куьмек гуда. 10 г кьенвай чIижерал 100 мл спирт илич­­на, 14 юкъуз мичIи чкада тада (гьар юкъуз юзуриз)­ хуьрек недалди вилик са чайдин тIурунавайди хъвада.­
8. Гъулцин тарцин (липа) кIарас кана хьайи руьхъ са­фунай яна, михьна, йикъа пуд сеферда, хуьрек не­дал­ди вилик чукIулдин кIвенкIвел алайди (1 г) туь­кьуьн­на кIанда.

Эхирдайни лугьун, къециз экъечIдайла, цварадин ранг ва я ни дегиш хьанваз хьайитIа, и кIвалахриз фикир гана,  духтурдин патав фена, жуван гьалдикай хабар гана, вахтунда  вилик пад кьуна кIанда.

Гьуьрметлу газет кIелзавай юлдашар! Чаз куь меслят кIанзава: квез чна кьилди къачур хъчарин мен­фятлувиликай кхьин хъсан яз аквазвани, тахьай­тIа, гьа  и жуьреда, кьилдин са азар сагъардай такьатрикай? Чахъ галаз алакъалу хьун патал 8909 483 57 20 нумрадиз зенг ийиз жеда. Куьн вири Аллагьдин патай сагъвал авайбур хьурай!

Башир  Шихмурадов,

Теймур  Гьабибов