2-декабрдиз Дербент шегьердин аялрин яратмишунрин кIвале, набутрин Международный йикъан сергьятра аваз, инвалид аялар патал мярекат кьиле фена. Ана иштиракай шегьердин кьил Рустамбег Пирмегьамедова къейд авурвал, мярекатда шад уьмуьр ва хъсанвал хуьзвай, руьгьдин къуват авай, итижлудаказ ва хийир аваз яшамиш жез кIанзавай кьетIен аялар кIватI хьанвай. — Чи асул везифа, — лагьана ада, — кьетIен аялриз хъсан шартIар яратмишун, абурун къайгъу чIугун ва ихьтин аялрин алем генани хъсанарун я.
Р.Пирмегьамедова гьакIни мярекат тешкилайбуруз, аялриз савкьатар гайи шегьердин собранидин депутат Ровшан Омароваз сагърай лагьана.
Мярекатдин иштиракчийриз шегьердин яратмишдай коллективри, набут аялри манийрикай, кьуьлерикай ва шииррикай ибарат концертдин программа къалурна.
КIвалин фойеда сагъламвилин мумкинвилер сергьятламиш хьанвай аялри чIугунвай шикилрин выставкани тешкилнавай.
Прогимназия ачухда
Мукьвара Дербент шегьердин кьил Рустамбег Пирмегьамедов мектебдиз фидалди яшара авай ва сифтегьан классрин аялар патал цIийикIа туькIуьр хъийизвай 15- нумрадин прогимназияда кIвалахар кьиле физвай гьалдихъ галаз таниш хьана.
Ада тамамарнавай кIвалахрик кумай кимивилер къалурна ва цIуд йикъан къене абур арадай акъудун буйругъна.
Къейдна кIанда, объект тайинарнавай вахтунда ишлемишиз вахкун тавурвиляй пудратчи кархана 1,5 миллион манатдин жерме ийидайвал я.
Шегьердин администрациядин капитальный эцигунрин управленидин кьилин пешекар Руслан Жамалдинован гафаралди, аялрин бахча авай корпусдин ва мектебдин дараматра кIвалахар тамамдиз акьалтIарнава. Вилик кумай месэла пекер чуьхуьдай чкани къазанхана герек тир тадаракралди таъминар хъувун я.
Прогимназиядин гьаятда аялар къугъвадай, ял ядай махсус майданарни туькIуьрнава.
Къагьриман Ибрагьимов
