Махачкъалада, Дагъустандин изобразительный искусствойрин музейда, РФ-дин халкьдин художник Гьейбат Гьейбатован 90 йисан юбилейдиз талукьарнавай выставка ачухнава.

И кардиз талукьарнавай мярекатда музейдин кьилевайбуру, республикадин яратмишдай интеллигенциядин ва жемиятдин векилри, ДГПУ-дин художественно-графический факультетдин муаллимри, художникри, скульпторри иштиракна.

Анал рахай РД-дин медениятдин виликан министр Наида Абдулгьамидовади Гь.Гьейбатова Дагъустандин монументальный искусство вилик финик кутунвай пай къейдна.

Выставкада иштиракай СтIал Сулейманан райондин администрациядин малуматрин агентстводин кьил Гуьллер Камиловадини медениятдин управленидин начальникдин заместитель Ярагьмед Ярагьмедова Гь.Гьейбатова лезги шииратдин классикриз, Ватандин ЧIехи дяведин къурбандриз туькIуьрнавай гуьмбетар чIехи къимет гуниз лайихлу тирдакай лагьана ва машгьур скульптордихъ чандин сагъвални яргъи уьмуьр хьун алхишна.

Выставка къведай йисан февралдин юкьваралди давам жеда.

Агьмед Магьмудов