РФ-дин Гьукуматдин Председатель Михаил Мишустина къул чIугунвай къарардал асаслу яз, газдалди таъминарунин жигьетдай кьабулнавай махсус программа давам жедайвал я ва гила адак медицинадинни образованидин идараярни кутунва. И къарарди дагъустанвийрин уьмуьрдиз гьикI таъсирдатIа ва программадин сергьятра аваз газдин сетар эцигунин кIвалахдин еришар гьихьтинбур жедатIа, РД-дин энергетикадин ва тарифрин министерстводин векилри ихтилатна.
Министерстводин регьбер Ризван Мурадован гафаралди, алай вахтунда догазификация программадикай менфят къачун патал арзаяр вуганвай дагъустанвийрин кьадар 4 агъзурдав агакьнава ва и рекъем йикъалай-къуз гзаф жезва. И делилди регионда ихтилат физвай программадихъ еке игьтияж авайди къалурзава. Идалайни гъейри, цIийи кIвалер, аялрин бахчаяр, мектебар, маса дараматар эцигзава ва абур вири газдик кутуна кIанзава.
“Виликдай газдалди таъминар тавунвай хуьрера региондин бюджетдин такьатрин ва я “Газпромдин” инвестицийрин гьисабдай газдин турбаяр тухун себеб яз, яшайишдин газификациядин сергьятар гегьенш жезва. Нетижада чкадин агьалийриз, тIимил харжияр авуналди, чпин кIвалериз газ тухудай мумкинвал жезва”, — лагьана Р.Мурадова.
Мус агакьда?
Виликдай РД-дин энергетикадин ва тарифрин министерстводин пресс-къуллугъди хабар гайивал, республикадин бязи муниципалитетра догазификациядин программадин сергьятра аваз кьиле тухузвай кIвалахар лап яваш камаралди вилик физва. Ведомстводин векилри гьисабзавайвал, и районра кIвалахрин еришар йигинарун патал “Газпром газораспределение Дагестан” карханади вичихъ авай вири мумкинвилерикай менфят къачун герек я. И карди план-графикда къейднавай вири мярекатар вахтунда акьалтIардай рекьерни ачухда.
“План-график — программадин сергьятра аваз газдин турбаяр агьалийрин кIвалерин, участокрин часпаррив кьван мус тухвана акьалтIарна кIанзаватIа къейднавай документ я. Ам региондин гьукуматди ва газификациядин рекьяй кардик квай Сад тир операторди тестикьарзава. Ана гьакIни программадин сергьятра аваз шумуд кIвализ газ тухвана кIанзаватIа къалурнава. Эгер аник тайин са касдин кIвал акатнавачтIа, ахьтиндан кIвал газдалди мус таъминардатIа, агьалиди вуганвай арзадин бинедаллаз туькIуьрзавай икьрарда къейдзава. Мензилдиз ва объектдихъ галаз алакъалу маса месэлайриз талукь делилар фикирда кьуртIа, и кIвалах 30 йикъалай 500 йикъал агакьдалди кьилиз акъудда”, — алава хъувуна министрди.
Къенин юкъуз авай делилралди, программадик 2492 кIвал акатнава. И документдик агьалийрин патай къвезвай арзайрин бинедаллаз дегишвилер кухтазва.
Менфят къачу!
Чна виликдайни хабар гайивал, яшайишдин газификациядин программадин куьмекдалди участокдин сергьятрив кьван газдин турбаяр пулсуз тухуз жезва.
И программадикай менфят къачун патал са шумуд шартI вилив хвена кIанзава: газдалди таъминариз кIанзавай кIвал авай чкада виликамаз газдин турбайрин кьилин хел аваз хьун, кIвализ ва участокдиз талукь документар гьазурун ва газдикай коммерциядин макьсадар аваз менфят къачун тавун.
РикIел хкин, арза газификациядин рекьяй кардик квай Сад тир оператордин порталдин (https://connectgas.ru), “Госуслуги” сайтдин, МФЦ-дин, республикада кардик квай газдин къуллугърин (абур 39 ава) куьмекдалди вугуз жеда. Арзадихъ галаз и документарни вугана кIанзава: паспорт, СНИЛС, ИНН, хсусият тирди тестикьарзавай шагьадатнама (зеленка), кIвал эцигнавай участокдиз талукь план.
Суалар пайда хьайитIа, “Газпром газораспределение Дагестан” ООО-дин +7 (8722) 67-28-88 нумрадиз зенг ийиз жеда.
Натали Гьажиева
