Махсус серенжемдикай

Россиядин оборонадин министерстводин кьил Сергей Шойгу­ди 6-декабрдиз малумарайвал, ноябрдин вацра Украинадин кьушунрикай 8300-лай виниз ксар кьена. Вацран муддатда Украинадин 5 самолет, 10 вертолет, 149 танк ва 300-лай артух бронемашинар терг хьана. Адан гафар “Новости” РИА-ди раижна.

“Россиядин Яракьлу Къуватри Донбасс азад авун давамарзава. Эхиримжи вахтара Майорск, Павловка, Опытное, Андреев­ка, Белогоровка Южная ва Курдюмовка чи гуьзчивилик акатнава. Луганскдинни Донецкдин ва Кьибле Донецкдин терефра Украинадин яракьлу къуватрин техникадизни инсанриз тIимил зиянар ганвач”, — лагьана министрди.

Къейд авурвал, Россияди вини дережадин дуьм-дуьз ядай яракьрин куьмекдалди военный системайриз, идарайриз ге­гьенш ягъу­нар кьазва. Запорожьедин АЭС-дин хатасузвал таъминарун­ патал Россиядин армияди вири серенжемар кьабулзава. Гьа са вахтунда Киевдин режимди эхиримжи кьве гьафтеда ЗАЭС-дихъ еке калибрдин 33 ракета ахъайна. ЧIехи пай ракетайрин вилик пад РФ-дин ПВО-ди кьазва. Москвади ВСУ-дин гьерекатар ядерный терроризм яз гьисабзава.

Министрди алава хъувурвал, военный махсус серенжемдин тежриба фикирда кьуналди, РФ-дин Яракьлу Къуватри кIелунин цIийи йисуз аскеррин пешекарвал хкажуниз артух фикир гуда.

Кьилиз акъатнач

Курскдин областда аэродромдал пилот галачир аппаратди гьу­жумуникди нафт хуьзвай гьамбарханади цIай кьуна. Идакай региондин губернатар Р.Старовойта телеграм-каналда хабар гана.

Адан гафаралди, гьужумдин нетижада инсанриз хасаратвилер хьанач. Курскдин аэропортуна гражданский самолетрин гьерекат 24-февралдилай акъвазарнава. Маса бязи регионра хьиз, инани самолетар цавуз экъечIунал сергьят ала.

Украинадин боевикар идалай вилик Саратовдинни Рязандин областрин аэродромрал гьужумиз алахъна. РФ-дин оборонадин­ министерстводин малуматралди, абуру советрин девирдин пилот­ галачир аппаратар ишлемишнавай, амма Россиядин авиацияди ПВО-дин куьмекдалди а аппаратар яна. Гьужумдин нетижада тех­никадин рекьяй къуллугъзавай 3 аскер телеф хьана, 4 касдиз­ ха­саратвилер, кьве самолетдизни са кьадардин зиянар хьана­.

Вердишвилер

Белоруссияди пландин бинедаллаз яракьлу къуватар женгинин  гьазурлухвилиз талукь вердишвилер кьиле тухуз башламишнава. Идакай анин оборонадин министерстводин пресс-къуллугъди хабар гана.

Къейдзавайвал, гьазурлухвилин серенжемар вири аскерриз талукь яз кьиле тухузва. Серенжемрин кьилин макьсад кьушунар женгиниз гьазур тир гьалда хуьн я.

Идалай вилик Белоруссиядин президент А.Лукашенкоди малумарайвал, дяве я Белоруссиядизни, я Россиядизни кIанзавач.

Ислягьвал кIанзава

Америкадин 47 процент агьалийриз США-ди жезмай кьван фад Украинадиз Россиядихъ галаз ислягь икьрар кьабулуниз эвер гана кIанзава. Къейдзавайвал, гьатта Украинадин мулкарикай са кьадар къакъатайтIани, америкавийрин зиянар екебур тахьун патал абуру ислягьвал арадал хкунин рахунар давамарун хъсан яз гьисабзава. “Новости” РИА-ди хабар гузвайвал, ихьтин­ малуматар международный крарин рекьяй Чикагодин советди тухвай хабарар кьунин серенжемдин делилрал асаслу яз тестикь хьанва.

Республикавийрикай ихьтин фикирдин тереф 63 процентди хуьзва, Демократвилин партиядин векилрикай — 36 процентди.

29 процентди США-ди Украинадиз гузвай куьмек яваш-яваш акъвазарун герек я лугьузва.

Мемориал чукIурзава

Вильнюсдин Антакальнисский сурара авай Литвадин виридалайни чIехи аскервилин мемориалдин 6 стела чукIурунив эгечI­нава. Идакай “ТАСС” чешмеди хабар гузва. Мемориал Ватандин­ ЧIехи дяведа чанар гайи советрин аскерар рикIел хуьнин лишан яз  эцигнавайди я.

Шегьердин муниципалитетдин векилри малумарнавайвал, мемориал чукIурунин гьазурвилер алатай гьафтедилай акуна.

ООН-ди памятник хуьн ва адаз талукь яз ахтармишунар тухун вичин хивез къачунайтIани, мемориал чукIурунин гьакъиндай Литвадин меркездин мэр Р.Шимашюса 22-ноябрдиз малумарнай. Гьатта мемориал тергуниз акъатзавай харжийрин кьадарни гьисабнай — саки 50 агъзур евро.

ЦIийи динозавр

Патагонияда жагъай кIарабрин бинедаллаз, Аргентинада ди­нозаврдин цIийи жуьре ачухнава. Идакай “Новости” РИА-ди хабар гузва.

Къейдзавайвал, цIийи динозавр анкилозаврдин жуьре я. Ам кьуд кIвач квайди, бедендал яргъивилихъди хъалхъас хъипрен хьтин кIеви къабух алайди я.  Динозаврдин умуми яргъивал 2-3 метрдикай ибарат тир. Пешекаррин делилралди, ам 70 миллион йис идалай вилик яшамиш хьанва.

«Лезги газет»