Мукьвара Каспийск шегьерда 96 йисан яшда аваз бине Ахцегьай тир машгьур муаллим, государстводин ва жемиятдин деятель Айишат Садикьовна Мусанабиева рагьметдиз фена.
А.С.Мусанабиевади саки 70 йисуз образованидин хиле зегьмет чIугуна. Ам Каспийск шегьердин 7-нумрадин юкьван мектебдин сад лагьай директор тир. Советрин девирда ада КПСС-дин Обкомда, окружкомда, горкомда, райкомда кIвалахна, Махачкъаладин, Каспийскдин, Ахцегьрин депутатрин советрин депутат хьана. Хейлин йисара Каспийскдин дишегьлийрин советдин президиумдиз регьбервал гана.
Дагъустандин лайихлу муаллим А.С.Мусанабиевадин зегьмет “Знак Почета” кьве ордендалди, ирид медалдалди, ДАССР-дин Верховный Советдин Президиумдин грамотайралди къейднава.
“Лезги газетдин” редакциядин коллективди Айишат Садикьовна рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва.
