Ахцегь райондин кьил Осман Магьмудович Абдулкеримов вичин хушуналди муниципалитетдин кьилин къуллугъдилай элячIна. И кардихъ галаз алакъалу месэла Ахцегь райондин депутатрин Собранидин 6-декабрдиз кьиле фейи сессиядал веревирдна.
РикIел хкин, Осман Абдулкеримов Ахцегь райондин кьиле 2014-йисуз акъвазнай. 2020-йисуз ам райондин депутатрин собранидин сессиядал мад сеферда и къуллугъдал хкя хъувунай.
“Муниципалитетдин агьалийри ва республикадин руководстводи заз вири рекьерай хъсанди тир райондин кьиле акъваздай мумкинвал гайивиляй за жув бахтлу инсан яз гьисабзава. Ахцегь девлетлу тарих ва еке мумкинвилер авай район я.
И райондай Ватандин ЧIехи дяведин кьве Игит, Украинада кьиле физвай махсус серенжемдин Игит, машгьур алимар, духтурар, композиторар, артистар… акъатна.
Залай гзаф кьадар хъсан адетар кардик кутаз алакьна, жегьилриз рехъ гунни къуй абурукай сад хьурай. Зи фикирдалди, 9 йисан къене районда тIимил кIвалахар авунач, амма виридалайни хъсан экспертар инсанарни вахт я. Абуру дуьз къимет гуда”, — лагьана О.Абдулкеримова, сессиядал рахадайла.
Къейд ийин хьи, Ахцегь райондин кьилин везифаяр вахтуналди Вадим Агъасиева тамамарзава.
«Лезги газет»
