Парк туькIуьрзава
Къеледин “Къирхляр-къапу” ва “Жарчи-къапу” варарин арада парк туькIуьрунин кIвалахар йигиндиз кьиле физва.
Маршрутдин вини кьилин паюна авай асул кIвалахар: къекъведай рехъ, гурар, майданар, цал мягькемарун ва экверин кабелар тухун акьалтIарнава. Участок вични аваданламишдайвал я. Маршрут тирвал архитектурадин гъвечIи жуьредин куьсрияр эцигнава.
Инал кIвалахзавай участокдин начальник Гьасан Гьасанован гафаралди, вири кIвалахар мукьвал вахтара акьалтIардайвал я. Объектдал 32 касди ва пуд махсус машинди кIвалахзава. Шегьердин Ленинан тIварунихъ галай куьчедин сад лагьай нумрадин кIвалин гьаятни аваданламишнава.
Ана кIвалахар пудратдин “Кубальфастрой” тешкилатди кьиле тухвана. И участокдин начальник Хайбула Хайбулаеван гафаралди, агьалийри къулайдиз ял ягъун патал гьаятда мебелни беседкаяр эцигнава.
Куьчейра къир цазва
Дербентдин Сальманан тIварунихъ галай куьчедин агъа пата авай “Гиппократ” медцентрадиз мукьва кьуд куьчеда аваданламишдай кIвалахар активнидаказ кьиле физва. Абур пудратдин “Маяк” ООО тешкилатди кьиле тухузва.
Шегьердин архитектурадин управленидин пешекар Рейсат Къурбановадин гафаралди, и объектда са къат къир цунин ва тротуардин плитка тунин кIвалахар акьалтIарнава. Пуд лагьай куьчеда чилин кIаникай газдин ва цин турбаяр тухванва. Гьаятриз гьахьзавай мулкара къван тунин кIвалахарни пландик ква.
КIвалахар гъиле кьуна тухунай шегьердин администрациядин руководстводиз агьалийри сагърай лугьузва. Абурун гафаралди, икьван гагьда микрорайондин куьчеяр къайдада авачир, фурарин, кьарадинни руквадин гъиляй я къекъвез, я машин гьализ жезвачир. И объектрал рабочийрин кьуд бригадади ва махсус цIуд машинди кIвалахзава.
Авадан ийизва
Орта-къапу куьче аваданламишунин сергьятра аваз Нарын-къеледиз физвай гурарилай къеледин цлан къерехдай агъуз Крупскаядин куьчедал кьван инсанар къекъведай рехъ туькIуьрун пландик ква. И сейрдай мулкуна адетдин къван твада.
Дербентдин архитектурадин Управленидин пешекар Елизавета Федоровадин гафарай малум хьайивал, проектдин бинедаллаз рекьера, къеледин цла, Орта-къапу ва Баят-къапу варара, йифиз гуьрчегдиз аквадайвал, эквер твада. Инра гьакIни ял ядай чкаяр, аялар къугъвадай майдан туькIуьрда, гъвечIи багъни (сквер) кутада. Куьче тирвал къерехра къацу набататар, тарар акIурда.
Ина гьакIни инженерный къурулушар дегишарда, экверин сеть чилин кIаникай тухуда. Проектдин сергьятра аваз машинар акъвазардай алава чкаярни туькIуьрун пландик ква.
Къагьриман Ибрагьимов
