Махачкъала шегьердин администрациядин кьилин везифаяр вахтуналди тамамарзавайди яз Ризван Казимович Гъазимегьамедов тайинарнава. Виликан мэр Салман Дадаев вичин хушуналди къуллугъдилай элячIна.
РикIел хкин, Р.Гъазимегьамедова икьван чIавалди Дагъустандин Гьукуматдин Председателдин заместитель яз кIвалахзавай. Алай йисан 22-ноябрдилай адан хиве Махачкъаладин мэрдин везифаяр туна.
Лагьана кIанда, Р.Гъазимегьамедова жуьреба-жуьре йисара республикадин меркездин депутатрин Собранидин председатель, РД-дин энергетикадин ва промышленностдин министр, Кеферпатан Кавказдин крарин рекьяй РФ-дин министрдин советник, “Дагестан” Газпром межрегионгаз” ГРО-дин крар идара ийидай директор яз кIвалахна.
“Лезги газетдиз” РД-дин Кьилин пресс-къуллугъди хабар гайивал, 29-ноябрдиз Сергей Меликова Ризван Гъазимегьамедоваз вице-премьердин къуллугъдал жавабдарвилелди зегьмет чIугунай сагърай лагьана ва адав РД-дин Гьукуматдин Гьуьрметдин грамота вахкана.
“Тежриба квехъ бес кьадар ава, гьавиляй куьне цIийи къуллугъдални квел ихтибарнавай везифаяр намуслувилелди кьилиз акъуддайдахъ зун кIевелай инанмиш я. Халкьдин патай ихтибар къазанмишун, агьалийрихъ галаз мягькем алакъаяр тешкилун лап важиблу я. Махачкъалади Дагъустан санлай вилик финин карда гьихьтин чка кьазватIа, чаз виридаз чизва. И кардихъ галаз алакъалу яз, республикадин меркез вилик тухудай план туькIуьрна кIанзава ва и жигьетдай региондин министерствойрихъ галаз санал кIвалахун герек я”, — лагьана Дагъустандин Кьили.
Р.Гъазимегьамедован бине Ахвах райондин Арчо хуьряй я.
Агьмед Магьмудов
