29-ноябрдиз РД-дин Кьил Сергей Меликова Махачкъаладин футболдин «Динамо» клубдин командадихъ, тренеррихъ ва кьилевайбурухъ галаз гуьруьш кьиле тухвана.
РикIел хкин, фадлай кардик кумачир клуб алатай йисуз Сергей Меликован теклифдалди цIийи кьилелай арадал хкана. Са йисан къене командадихъ хъсан нетижаярни хьана: “Динамо” уьлкведин пешекарвилин футболдин кьвед лагьай дивизиондиз акъатна.
Дагъустандин Гьукуматдин Председателдин заместитель Муслим Телякавова республикада футбол вилик тухун патал кьабулзавай серенжемрикай ихтилатна. “Вири гъвечIи чIавалай эгечIзава. Гьавиляй футболдин майдандал сифте камар къачузвай аялриз дуьз рехъ къалурун лап важиблу я. Къе региондин мектебра футболдин лига вилик физва ва ана цIи 150 агъзур аялди иштиракзава. Гьелбетда, абурукай вирибурукай пешекар футболистар жедач, амма виридалайни бажарагълубуру неинки са республикадин, гьакIни уьлкведин машгьур футболистрин жергеяр къалинардайдал шак алач”, — лагьана М.Телякавова.
РД-дин физический культурадин ва спортдин министр Сажид Сажидова республикада футбол вилик тухуниз кьетIен фикир гунай Сергей Меликоваз сагърай лагьана. Адан заместитель Будун Будунова хабар гайивал, “Динамо” командада къугъвазвайбуруз РФ-дин Кубокдин матчра иштиракунай ганвай пулдин пишкешар Украинада кьиле физвай махсус серенжемда иштиракзавайбуруз рекье тунва.
Мярекатдин эхирдай Сергей Меликова командадихъ гележегда мадни еке агалкьунар хьун алхишна ва “Динамодихъ” чIехи гележег авайдахъ вичин инанмишвал къалурна.
«Лезги газет»
