Уьлкведа 27-ноябрдиз къейд авур Дидедин юкъуз Ахцегь райондин кьилевайбуру махсус серенжемда иштиракзавай агьалийрин мукьвабурухъ галаз гуьруьш кьиле тухвана.

Муниципалитетдин администрациядин пресс-къуллугъди хабар гузвайвал, мярекат медениятдин ва спортдин управленидин начальник Къистер Гъаниевади ачухна. Ада мярекатда иштиракзавай дишегьлийриз Дидедин югъ мубаракна, абурухъ чандин сагъвал, яргъи уьмуьр хьун алхишна.

Райондин кьил Осман Абдулкеримова инсандин уьмуьрда дидеди гьихьтин чка кьазватIа къейдна:

— Виридалайни четин пеше дидевал я, — лагьана О.Абдулкеримова. — Халис кье­гьалар чIехи ийизвайбур дидеяр я, гьикI лагьайтIа, абуру чпин рухвайрин бей­нида гьахъвал, жуьрэтлувал, къенивал, жавабдарвал ва маса ерияр битмишарзава. Зи мурад квехъ виридахъ чандин сагъвал, куь кIвалера берекатар, ри­кIера шадвал хьун я. Къуй куь рикIер веледрикай динж хьурай, — лагьана райондин кьили.

О.Абдулкеримова гьакIни хабар гайи­вал, ам ва райондин депутатрин собранидин председатель Абдул-Керим Палчаев Украинада кьиле физвай махсус се­ренжемда (СВО) Ахцегь райондай иш­тиракзавайбурухъ галаз гьар гьафтеда­ рахазва. “Чаз ана авай гьаларикай хабар я ва чун абуруз алакьдай куьмекар гуз алахъ­зава. “Посылка от матери” серенжемдин сергьятра аваз, чи районэгьлийрин куьмекдалди чна СВО-дин иштиракчийриз рекье твазвай затIар кIватIзавай пунктуниз пуд сеферда недай-хъвадай суьрсет ва маса затIар ракъурна. Чна ре­кье тур посылкаярни абурал агакьнава”, — алава хъувуна О.Абдулкеримова.

Мярекатдин сергьятра аваз, райондин медениятдин ва спортдин управленидин къуллугъчийри дидейриз бахшнавай манияр тамамарна. Халкьдин яратмишунар хуьник ва вилик тухуник кьетIен пай кутунай О.Абдулкеримова Таира Муспагьовадив, Рубаба Къурбановадив ва Зулфи­ят Велиевадив администрациядин патай разивилин чарар вахкана.

О.Абдулкеримова, мярекатдин иштиракчийрихъ галаз рахадайла, нихъ гьихьтин месэлаяр аватIа жузуна ва райондин администрация датIана куьмек гуз гьазур тирдакай хабар гана.

«Лезги газет»