Вирироссиядин халкьдин фронтдин (ОНФ) Дагъустан Республикада авай  активистри 2 агъзурдав агакьдалди агьа­лияр яшамиш жезвай хуьрера медицинадин куьмек агакьарунин саягъдиз ва адан еридиз къимет гузва. Общественникри республикадин кьве районда медицинадин 9 идара ахтармишна. Абуру фельдшервилинни акушервилин пунктарин ва амбулаторийрин материально-технический база авай гьал, чкайрин агьалийривай абур чпиз ийизвай медицинадин къуллугърин еридилай рази яни-тушни чирна.

Ахтармишунар Къарабудахкент ва Ахцегь районрин медицинадин идарайра кьиле тухванвай. Къарабудахкент райондикай куьрелди лагьайтIа, Жангъа, Ачи, Сирагъи, Ленинкент хуьрерин ФАП-ра гьалар лап чIурубур я, бязи чкайра пешекарар бес тахьунин месэлани лап хцидаказ акъвазнава.

Кьве райондин ФАП-рал ацалтзавай четинвилерни гьа сад хьтинбур я.  Ахтармишай 9 объектдикай санани, са Ахцегь райондин Къурукаларин идара квачиз, коляскайра авайбур патал махсус чкаяр (пандусар) авач. Материально-технический рекьяй­ таъминвал гьич са кIусни разивал ийиз жедайди туш. ЧIе­хи пай дуьшуьшра виридалайни гзаф лазим къвезвай шей­эр (электрикдин стериализатор, медицинада ишлемишзавай алатар, дезинфекция ийидай къапар, холестериндин кьадар чирун патал анализ къачудай экспресс-анализатор ва икI мад) авач.

— Ахтармишай гьар сана, кьведан чкадал, авайди са холо­дильник я. Абур сад кьилди- рапар, муькуьдини дарманар хуьн патал лазим я, — къейдзава ОНФ-дин республикадин “Социальная справедливость” дестедин регьбер Рустам Айгумова­.

Кьилди Ахцегь райондин ФАП-рикай рахайтIа, гьалар Къа­ра­будахкент райондилай са кIусни артух туш. Цуругъа мед­пунктунин дарамат капитальнидаказ ремонтна кIанзава. Материально-технический база лап усал гьалда ава. Дараматда азарлуйриз чпел нубат къведалди акъваздай бес кьадар чка, хъвадай яд авач.

Къурукаларин хуьрени материально-технический гьалар лап чIурубур я. Носилкаяр, костылар, шинаяр, стериализатор­ ва лазим маса алатар авач. Ахтармишай ФАП-рикай гьич сад­ни Интернетдик квач.

— Кьве райондин агьалийрини диагностикадин ахтармишу­нардай мумкинвал, лазим дарманар авачирдан патахъай ши­каятна. Райцентрадай “Тади куьмекдиз” эверун четин акъваз­зава.

Халкьдин фронтдин Дагъустанда авай отделениди республикадин здравоохраненидин министерстводивай меди­цинадин идарайрин кIвалах, кардик квай нормайрал ва тIала­бу­н­рал асаслу яз, къайдада тунин патахъай тIалабнава, — къейдна ОНФ-дин Дагъустанда авай региональный штабдин со­председатель Татьяна Рассохинади.

РикIел хкин: здравоохраненидин сифтегьан хилен ачухвилин важиблувиликай уьлкведин Президент, Халкьдин фронтдин башчи В.Путина Федеральный собранидиз рекье тунвай Чарче ла­гьанва. Государстводин Кьили 2020-йисалди 2000-дав агакьна­ агьалияр яшамиш жезвай хуьрера ФАП-ар ва амбулатори­яр кIва­чел ахкьалдар хъувунин ва цIийибур эцигунин месэла эцигнай. Путина Вирироссиядин Халкьдин фронтдивай  агьалийрихъ галаз­ алакъа хуьн, чкайрал авай гьаларин мониторинг тухун тIалабнай.

Рагнеда Рамалданова