Россиядин ФНС-дин Дагъустанда авай Управлениди рикIел хкизвайвал, кьилдин ксарин эменнидилай къачузвай 2021-йисан налог гана кIанзавай вахт 1-декабрдиз алатзава.Управленидин пресс-къуллугъди хабар гузвайвал, налогар и кар патал махсусдаказ туькIуьрнавай “Уплата налогов и пошлин” къуллугъдин ва я “Госкъуллугърин” сайтдин куьмекдалди ачухиз жезвай “Личный кабинет налогоплательщика” чинилай гудай мумкинвал ава. Идалайни гъейри, налогрин идарадай хтанвай чар гваз гьакъи (кьил алачиз) банкуна, почтада, МФЦ-дин идарада ва я чкайрин администрацийрин кассайра гуз жеда.
“Эгер агьалиди налог вахтунда гун тавуртIа, пакадин йикъалай (2022-йисан 2-декабрдилай) арадал атанвай бурж пеняйрин гьисабдай чIехи жез башламишда. И дуьшуьшда налогрин органди истемишзавай чар рекье твада. Эгер касди гьамни кьилиз акъуд тавуртIа, ам суддив вугуда. Идалай кьулухъ бурж сергьятламишдай серенжемар кьабулзавай суддин приставри истемишда, мисал яз, абуру буржлу касдин банкуна авай счетдал къадагъа эцигун мумкин я”, — гъавурда твазва УФНС-дин пресс-къуллугъди.
Къейдзавайвал, тамам тушир мобилизациядин сергьятра аваз военный къуллугъдал эвер ганвай агьалийриз и серенжемар талукь туш. Абур патал налогар гудай вахт къуллугъ тамамарзавай кьван вахтуналди ва военный къуллугъдилай элячIайдалай кьулухъ алатдай пуд лагьай вацран 28-йикъалди давамарнава.
«Лезги газет»
