“КIела, кIела ва мад кIела!” — Владимир Ильич Ленинан и га­фар несилар патал эвер гуниз элкъвенай. Гзаф вахтар, йисар алатнаватIани, абурун метлеб къени квахьнавач: чирвилер гьамиша герек я.

Чирвилер авай инсандилай зурба крар алакьда. И гьакъи­къат чаз уьмуьрдайни аквазва. Чирвилери инсан къуллугъдин гурарин кIарарайни винелди акъудда. Ктаб галачиз мектебда кIел­завай аялдивай чирвилер къачуз  жедач. Мектебдиз физвай  гьар са аялдин чантада  ктабар хьун чарасуз я.

Даяз фикирраллай бази ксари, компьютердихъ агъуна, ктабриз са акьван гзаф фикир гуз аквазвач. Им еке ягъалмишвал я. И гьалатI туькIуьр хъувуртIа хъсан жеда. Аялдин чантада вири кта­бар хьунилай  гъейри,  ктабханайрихъ галазни алакъа хвена кIа­н­да. Анрай къачуз, кIелдай ктабрини квез, гьуьрметлу аялар,  акваз-акваз куьмекда, чирвилер мягькембур, дурумлубур жеда. КIанзавайди исятда ктабханайрин кIвалах мадни жанлу авун я.

СтIал Сулейманан райондин  28 хуьрени и жигьетдай гьалар хъсан патахъ дегиш жезвайди хьиз аквазва.  Алкьвадрин, Сардархуьруьн, Курхуьруьн, КIварчагъ дередин хуьрерин библиотекайриз газет-журнал, ктабар кIелиз физ-хтун артух хьанва.

И йикъара зун Алкьвадрин библиотекадиз фена. Ана ДГПУ-да кIелнавай Лаура Шабановади  кIвалахзава. Ктабханадин цларикай “Лезги чIал чи гуьзгуь ва абур я”, “ТIебиат хуьх!”, “Аялар наркотикриз акси я”, “Шарвили лезги халкьдин игит я”, “Лезги чIал зи дамах я” кхьенвай ва маса  плакатар, таблицаяр куьрсар­нава. Малум хьайивал, эхиримжи вахтара иниз хуьруьнвияр атун-хъфинни къалин хьанва. Инсанри цларал алай затIариз, столрал алай “Лезги газет”, “Куьредин хабарар”, “Дагъустандин правда” газетриз, “Кард”, “Дагъустандин дишегьли”, “Самур” журналриз артух фикир гузва, абур ван алаз сада кIелзава, амайбуру яб гузва,  ахпа чпин фикирар лугьузва. И хуьруьнви, вичин тIвар дуьньядиз раиж хьанвай философ Абдусалам Гьуьсейнован 80 йисаз талукь яз туькIуьрнавай  фотомонтажни  итижлуди   хьанва.

Хуьруьн агьалияр тир Гьуьсейн Гьуьсейнов, Максим Абдурагьимов, Людмила Агьмедова, Гуьлпиче Сефикъулиева, Нина Сийи­дагьмедова ва масабур иниз мукьвал-мукьвал къвезва. Чпиз ге­рек ктабрилай гъейри,  абуру Лаурадиз бязи месэлайрай куьмекар, меслятарни гузва. Лауради ина кIвалахиз анжах 2 йис я. Адаз кIвалахдин планар кхьиз, абур тамамариз, ктабрин обзорар тухуз, хуьруьнбурун арада цIийи ктабар раиж ийиз чизва. Ктабханадихъ 5 агъзур ктаб ава. Абур  герек чкайрал ала. Библиотекадиз, лазим хьайи ктабрин суракьда аваз, мектебдин аялар, муаллимарни  къвезва. Ихьтин алакъа хъсан хьанва. Санлай къачурла, ктабхана­дихъ галаз 150 касдилай гзафбуру активнидаказ  алакъа хуьзва.  Лаура Шабанова абурун къуллугъда акъвазнава.

Къведай йис патал газетарни журналар кхьиз эгечIнава. “Лезги газет”,  райондин газет ва са шумуд журнал сифтебурукай яз кхьидайвал я. Хуьруьн администрацияди (кьил — Гьуьсейнов Алим) и карда куьмек гузва.

Райсудин Набиев