Россельхознадзордин Кавказдин регионрин уртах управлениди къецепатан экономикадихъ галаз алакъалу кIвалахрин (ВЭД) иштиракчийриз Азербайжан республикадиз метягь тухунин цIийи къайдайрикай хабар гузва.
“Алай йисан 1-декабрдилай Азербайжандин мулкунал маса гун патал Россиядин Федерациядай тухузвай недай суьрсетдин гьар жуьре шейэр, этикеткайрал алай текстер азербайжан чIалал таржума тавуна, сергьятдилай алудун къадагъа ийизва”, — къейднава идарадин пресс-релизда.
ЦIийи къайдаяр кардик кутунин себеб къунши уьлкведи метягьдиз ийизвай истемишунар дегиш хьунихъ галаз алакъалу я. ИкI, Азербайжан республикадин “Муьштерийрин ихтиярар хуьнин гьакъиндай” къанунда къейднавайвал, маса гузвай шейинин гьакъиндай этикеткадал алай вири делилар, гьа жергедай яз адан тIвар, гьакIни ишлемишдай къайда гьам маса чIаларал, гьамни азербайжан чIалалди алаз хьун лазим я.
Гьа икI, Азербайжандиз маса гун патал метягь тухунал къадагъа эцигуникай кьил къакъудун патал 2022-йисан 1-декабрдилай къунши уьлкведиз рекье твазвай шейэрал азербайжан чIалал таржума авунвай делилар хьун чарасуз я.
Информациядин “Цербер” къурулушдин (государстводин ветеринариядин хилен “ВетИС” къурулушдиз ухшар) делилралди, Россиядин карханайри Азербайжандиз некIе-дин ва якIун суьрсет, балугъар ва гьуьлуьн суьрсет, маларин алафдик кутадай алава шейэр, ветеринариядин дарманар ва са жерге маса шейэр агакьарзава.
Россельхознадзордин чкайрал алай управленийра Азербайжандиз пар рекье твадайла этикеткайрал алай текстер таржума авунин гьакъиндай истемишунар кьилиз акъудзавай тегьердал ийизвай гуьзчивал артухарзава.
«Лезги газет»
