СтIал Сулейманан райондин Курхуьруьн сергьятдай авахьзавай къубуйринни къаналрин арада “Кировский” къаналдин важиблувал екеди я. Ада вичин ятар саки 10 хуьруьн мулкариз агакьар­зава. Са шумуд чкадилай адал муькъвер ала, чебни — улакьри ишлемишзавайбур.

Курхуьруьн сергьятда авай муьгъ лап фад, колхозар тешкил хьайи йисара  эцигнавай­ кьуларинди тир. Совхоздин девирда ам ремонтна, са тIимил мягькемарнай. Эхиримжи­ йисара залан улакьрин гьерекат гзаф хьун се­беб яз, адаз гуж гузвай, муьгъ къайдадикай хкат­завай.

Ингье и месэла гьялун патал, яни бинеди­лай­­ ремонтунин мураддалди хуьруьз Дер­бент­­дай  “Маяк”  карханадин пешекаррин бригада атана.

Участокдин начальник, эцигунардай тежрибалу инженер Багьадин Талибован гуьзчивилик кваз, бригадади муьгъ бинедилай  ре­монт авунин кIвалахар кьиле тухузва. Са куьруь вахтунда абуру улакьриз фидай маса чка туькIуьрна, алай муьгъ са кьилихъай чу­кIурна, анал лазим тир ракьунни бетондин материалар гъана,  кIвалах башламишнава. ЧIимел жез, манийвал ийизвай гьавадин шартIаризни  килиг тавуна, эцигунардайбур тир Эминов Ра­фика, Мегьемедов Анвара, Эминов Масана, Талибов Багьадина вичи ва масабуру  гьакъисагъдаказ зегьмет чIугунва. Са куьруь вахтун­да абуру, проектда къалурнавайвал, гьяркьуь­вилел — 6 ва яргъивилел 10 метр алай ра­кьун­ни бетондин и имарат эцигна, “ял ягъиз”  тунва­. Инженерди гъавурда турвал, технологиядин истемишунралди,  цанвай цементдин къаришма фер-затI тахьана, 28 юкъуз яваш-яваш кьурун лазим я. Ан­жах 28 йикъалай, яни тахминан декабрдин сифте кьиляй муьгъ ачухда, иш­лемишиз вахкуда. Адалай сифте кьезил, ахпа пар авай гужлу, еке машинар фида.

Чаз жемятдиз и муьгъ ишлемишдай сагъвал хьурай лугьуз ва хуьр патал важиблу и кар кьилиз акъатун мубаракиз кIанзава.

Райсудин Набиев